У Гродне імем Быкава назавуць вуліцу на ўскрайку горада, за птушкафабрыкай

У Гродне, дзе Быкаў доўгі час жыў, з'явіцца вуліца яго імя. Але месца ўлады абралі на ўскрайку горада, паведамляе "Радыё Свабода".

За апошні час да Гродна далучылі навакольныя вёскі. На месцы некаторых або побач з імі будуюць новыя спальныя мікрараёны. Вуліца Быкава будзе ў адным з такіх, называецца ён Альшанка. Назва прыгожая, але не больш за тое.

Будуецца гэты мікрараён у далёкай, "занёманскай" частцы горада, за птушкафабрыкай. Прычым не адразу за ёй, а на адлегласці. Бо вялікую плошчу займае санітарная зона фабрыкі, дзе жытло будаваць нельга.

Такім чынам, і вуліца пісьменніка будзе, і ніхто, апроч жыхароў шматпавярховікаў, аб ёй не даведаецца.

Тыя, хто змагаўся за вуліцу Быкава, адчуваюць расчараванне і горыч. Яны прапаноўвалі назваць у гонар Быкава вуліцу, якая зараз носіць імя кіраўніка першага ўрада СССР Свярдлова.