У Гродне адбылася прэзентацыя кнігі турэмных аповядаў Змітра Дашкевіча "Чарвяк"

У Гародні прэзэнтаваў сваю кніжку турэмных аповядаў былы палітычны вязень Зміцер Дашкевіч. Кніга "Чарвяк" - гэта зборнік апавяданняў, у якіх аўтар дае чытачу карціну сучаснай карнай сістэмы ў Беларусі, паведамляе "Радыё Рацыя".

Большасць тэкстаў было напісана падчас яго зняволення ў Глыбоцкай ды Горацкай калоніях у 2011-2013-ым гадах.

Зміцер Дашкевіч падзяліўся рэжымам дня, калі быў у турме.

- Чым дакладней распісана, тым прасцей сядзіцца. Падымаўся я ў пяць, рабіў зарадку хвілін 30, ішоў на ўнітаз - абліваўся вадой. Вось гэтыя старыя савецкія ўнітазы пляскатыя ў камеры. На яго можна стаць, абліцца, памыцца. А на новы - ніяк. У Мазыры ў калоніі новы будунак стаіць - унітазы новыя, шклопакеты, але зэку там кепска сядзець. Чым прасцей сістэма, тым яно лепш. Каша ў 06.15, потым прагулка.

Аповяд, які даў назву кніжцы "Чарвяк", аўтар напісаў, калі знаходзіўся ў гарадзенскай турме. На прэзэнтацыю прыйшлі студэнты, а таксама былыя вязні гарадзенскай турмы.