Кнігу Ігара Бабкова назвалі лепшым усходнееўрапейскім раманам

Пісьменнік атрымаў літаратурную прэмію Вышаградскай групы за раман "Хвілінка". Прэмія прадугледжвае грашовы прыз - 1 300 еўра. Узнагароджанне адбудзецца 3 снежня ва ўніверсітэце Яна Каменскага ў Браціславе. А да канца года павінен з’явіцца славацкі пераклад рамана, паведамляе "Наша Ніва".

Сёлета Ігар Бабкоў з "Хвілінкай" стаў лаўрэатам літаратурнай прэміі імя Гедройца, якая ўручаецца штогод за лепшую кнігу прозы на беларускай мове. Гэта кніга "пра кавярню, дзе адбываліся важныя для Мінска і Беларусі рэчы". Пісьменнік паведаміў, што раман таксама ўзяліся перакладаць на вянгерскую мову.

Вышаградская група - аб’яданне чатырох цэнтральнаеўрапейскіх дзяржаў: Польшча, Чэхія, Славакія, Венгрыя.