Пракурор просіць для Юрыя Рубцова тры гады “хіміі”

Актывіста вінавацяць у злачынстве, прадугледжаным артыкулам 391 Крымінальнага кодэкса “Абраза суддзі або народнага засядацеля”. Працэс вядзе суддзя Наталля Вайцэховіч.

Дзяржаўны абвінаваўца  Гардзеенка запатрабаваў для  Юрыя Рубцова прызначыць пакаранне ў выглядзе абмежавання свабоды тэрмінам на тры гады, паведамляе ПЦ "Вясна". 

Перад тым намеснік старшыні праваабарончага цэнтру “Вясна” Валянцін Стэфановіч, які назірае за ходам судовага працэсу, заявіў, што калі Юрый Рубцоў бдзе асуджаны да абмежавання волі з накіраваннем ва ўстанову адкрытага тыпу, гэта фактычна будзе азначаць, што ў Беларусі з’явіўся новы палітвязень.

Адвакат прасіў апраўдаць Рубцова, паколькі прамых доказаў знявагі суддзі Кірылы Палулеха няма: у красавіку на адміністратыўным працэсе над Рубцовым не вёўся аўдыёзапіс, не праводзілася відэаздымка. Абвінавачванне грунтуецца толькі на паказаннях супрацоўнікаў міліцыі, якія адвольна затрымлівалі Рубцова яшчэ пад час Чарнобыльскага шляху. Таму немагчыма ўпэўнена казаць, ці зневажаў Рубцоў усю судовую сістэму, ці асобнага суддзю. А паказанні такіх сведкаў выклікаюць зразумелыя сумненні.

16 верасня, у першы дзень судовага працэсу, суддзя Наталля Вайцэховіч дапытала Юрыя Рубцова. Ён патлумачыў, што 28 красавіка яго даставілі ў суд Савецкага раёна Мінска напаўаголеным і без акуляраў, што абражала ягоную годнасць. Апроч таго, ён не змог азнаёміцца з матэрыяламі адміністратыўнай справы, паколькі быў без акуляраў. Таму і сказаў, што гэта “не суд, а судзілішча”.

Затым адбыўся допыт пацярпелага – суддзі суду Савецкага раёна Мінска Кірылы Палулеха.

Былі дапытаныя сведкі: супрацоўнікі АМАП Шарко і Андрэй Белы, а таксама супрацоўнік РУУСа Павел Нелюбовіч, якія прысутнічалі пры разглядзе адміністратыўнай справы і сакратарка Дар’я Стасюк, якія пацвердзілі словы суддзі Палулеха, што Рубцоў абразіў суддзю. Яны паведамілі, што Рубцоў нецэнзурна выказваўся, казаў, што гэта не суд, а судзілішча, і назваў суддзю Кірыла Палулеха “падонкам”.

Перанос справы перанесены з-за таго, што на суд з'явіліся не ўсе сведкі.