Беларускамоўная першакласніца: Добра, што Лукашэнка ня можа прыехаць ва ўсе школы (відэа)

Шасцігадовая Каміла Ляўчук з Брэста завяла ў інтэрнэце відэадзённік, у якім дзеліцца сваімі ўражаннямі пра навучанне ў школе. Нягледзячы на ўсе намаганні бацькоў, Каміла не змагла трапіць у беларускамоўны клас і навучаецца па-расейску, перадае "Радыё Сабода".

Каміла - дачка берасцейскіх журналістаў Алеся Ляўчука і Міланы Харытонавай. Цягам лета бацькі абівалі парогі чыноўнікаў, каб рэалізаваць права свайго дзіцяці навучацца па-беларуску.

Чыноўнікі казалі, што беларускі клас адкрыецца, толькі калі набярэцца ня менш як пяць вучняў. Аднак у трохсоттысячным Брэсце так і не знайшлося столькі ахвотных вучыцца па-беларуску. Не дапамагла ні рэклама ў сродках масавай інфармацыі, ні расклейванне бацькамі Камілы абвестак пра стварэнне беларускага класа.

1 верасня Каміла Ляўчук пайшла ў звычайны расейскамоўны клас школы № 34. Маці, Мілана Харытонава, распавяла, што беларускую мову Каміла будзе вывучаць толькі раз на тыдзень.

Бацькі Камілы стварылі ў інтэрнэце відэадзённік, у якім першакласніца дзеліцца сваімі ўражаннямі ад наведвання школы. Ужо выйшлі тры ролікі. У апошнім Каміла распавяла, што ў школе ёй падаравалі кніжку "ад прэзыдэнта Лукашэнкі":

"Калі падаравалі кніжку, сказалі, што гэта ад самога прэзыдэнта Лукашэнкі, і яшчэ сказалі, што Лукашэнка ня можа прыехаць ва ўсе школы. І я ў гэты момант падумала, што - ну і добра, што ён ня можа прыехаць ва ўсе школы", - распавядае Каміла пра ўражанне ад падарунку.

"Пыталіся, як яго завуць. Усе дзеці крычаць: "Лукашэнка!" А настаўніца кажа: "Давайце цалкам". "Аляксандар Рыгоравіч Лукашэнка" усе крычаць. А я сяджу маўчу, таму што не хачу яго імя нават называць", - кажа Каміла.

Мілана Харытонава сказала, што відэадзённік Камілы будзе пэрыядычна папаўняцца:

"Усе ж пытаюцца пра школу, як там, ці не пакутуе дачка ў расейскамоўным класе. Вось мы, каб кожны раз не паўтараць, зрабілі такі дзённік, падсумаванне раз на тыдзень-два. Глядзяць яго сябры нашы, калегі, бабуля. Каміла, як бачым, не пакутуе, у школе ёй падабаецца, але і нейкіх, на яе погляд, праблемных момантаў яна не абміне. Відаць, гэтая рыса характару - у спадчыну ад бацькоў..."