Беларусаў агітуюць ехаць ваяваць за "Новаросію"

Дзеля агітацыі выкарыстоўваецца правераны шаблон: маўляў, улада ў Кіеве была захоплена хунтай, якая складаецца з "агентаў ЦРУ, радыкальных украінскіх нацыяналістаў - бандэраўцаў і іншай шушары", піша рэгіянальны партал minskby.com.

Пры канцы допісу арганізатары группы праводзяць паралелі: "Усе гэтыя адкіды вельмі моцна нагадваюць нашых местачковых БНФаўцаў, якія на амерыканскія грошы хочуць зладзіць аналагічны бардак і ў нас у рэспубліцы".

Добраахвотнікаў заклікаюць ня толькі ўдзельнічаць у ваенных дзеяннях супраць "кропаў", але і аказваць іншую магчымую дапамогу, не выяжджаючы за межы Беларусі.

Адміністрацыя расейскай сацыяльнай сеткі ніяк не рэагуе на шавіністычную групоўку. Пры гэтым варта згадаць, што сёлета ў сакавіку "ВКонтакте" угледзела прыкметы "экстрэмізму" у нацыянальным гербе "Пагоня".

Напярэдадні Дня Волі была заблякаваная інтэрнэт-праграма распрацоўніка тэматычнага дадатку, гарадзенца Кастуся Новікава: "Вам адмоўлена ў разьмяшчэнні дадаткаў у сувязі з парушэннем артыкула 20.3 Кодэксу аб адміністрацыйных правапарушэннях Расейскай Фэдэрацыі "Прапаганда і публічнае дэманстраваньне нацысцкай атрыбутыкі ці сымболікі, альбо публічнае дэманстраваньне атрыбутыкі ці сымболікі экстрэмісцкіх арганізацый".