Адмянілі знакаміты ў Беларусі фестываль "Рок па вакацыях"

"За апошні тыдзень клубок пэўных канфліктаў, інтарэсаў, супярэчнасцяў і нявырашаных асобных пытанняў дасягнуў свайго апагею. Таму я проста вымушаны быў адмяніць наша мерапрыемства, каб, магчыма, не стала яшчэ горш ... а карміць скандаламі і рознымі інтэрв'ю - нікога не збіраюся, "- паведаміў на сваёй старонцы ў Facebook  прамоўтэр Павел Кашырын. 

Найстарэйшы ў Беларусі рок-фэст "Рок па вакацыях" планавалася правесці 19 верасня ў мінскім клубе "Re: Public". 

Кашырын адзначыў, што да гэтага часу ніякіх перадумоў для адмены фестывалю не было. Пра месца і час вяртання грошай за набытыя квіткі паведамяць дадаткова. 

Фестываль "Рок па вакацыях" ладзіцца ў Беларусі з 1993 года. Першапачаткова ён праводзіўся на адкрытых пляцоўках, а ў 2008 годзе пасля 12-гадовага перапынку адрадзіўся ў клубным фармаце.