Шок ад дыскрымінацыі працоўных у Беларусі атрымала кіраўнік Міжнароднай канфедэрацыі прафсаюзаў

Личности

Пра гэта яна заявіла 15 верасня на сустрэчы з кіраўніцтвам і актывістамі беларускіх незалежных прафсаюзаў. Сустрэча адбылася ў рамках афіцыйнага візіту кіраўніка МКП ў Мінск 15-16 верасня, паведамляе БелаПАН.

Падчас гутаркі яе ўдзельнікі распавялі Барраў пра сітуацыю з правамі рабочых у Беларусі, а таксама пра факты дыскрымінацыі чальцоў свабодных прафсаюзаў на дзяржпрадпрыемствах і арганізацыях. 

У гутарцы з журналістамі пасля гэтай сустрэчы генсакратар МКП адзначыла, што была шакаваная фактамі пагаршэння дыскрымінацыі ў дачыненні да свабодных прафсаюзаў. Асобна яна адзначыла дэкрэт №9 кіраўніка Беларусі. Нагадаем, што ён забараняе звальняцца работнікам лесаапрацоўчай прамысловасці, калі там ідзе мадэрнізацыя.

"Я была здзіўленая наступствамі дэкрэта № 9, які тычыцца фактычна прымусовай працы. Я працую ў многіх праблемных рэгіёнах, у тым ліку краінах Персідскага заліва, дзе існуюць сур'ёзныя праблемы ў плане дыялогу з уладамі, але рабства ў XXI стагоддзі - такое нават там мала дзе сустрэнеш", - адзначыла Бараў. 

Кіраўніца міжнароднага прафсаюзнага руху 16 верасня будзе сустракацца з намеснікам міністра замежных спраў Беларусі Валянцінам Рыбаковым і намеснікам міністра працы і сацыяльнай абароны Ігарам Старавойтавым. Яна абяцала ўзняць усе гэтыя праблемы на сустрэчы.