У Беларусi збіраюць подпісы за закон "Аб абароне жывёлаў"

У Беларусі квітнее жорсткасць у адносінах да хатніх любімцаў: іх выкідаюць, нагуляўшыся, калечаць і нават забіваюць. У вясенне-асенні пэрыяд выпадкі забойства ці жорсткага пазбаўлення ад навароднага прыплоду не паддаюцца падліку. Калі ў Мінску і іншых вялікіх гарадах існуе адлоў і непрацяглае ўтрыманне перад усыпленнем катоў і сабак, то ў іншых населеных пунктах жывёлаў забіваюць пасярод белага дня.

Актывісты лічаць, што даўно надышоў час далучыцца да цывілізаваных краінаў, у якіх праблема кантролю колькасці бяздомных жывёлаў вырашаецца гуманным чынам, а за жорсткае абыходжанне з жывёламі прадугледжанае пакаранне, паведамляе сайт belngo.info.

Арганізатары кампаніі звяртаюцца да грамадскасці з просьбай падпісаць зварот па-беларуску ці па-расійску праз Zvarot.by.

Важна адзначыць, што дакумент, падрыхтаваны з дапамогай сэрвісу Zvarot.by, аформлены такім чынам, што мае юрыдычнае значэнне, і абавязковы да разгляду, у чым яго істотнае адрозненне ад шматлікіх петыцыяў.

Вясной гэтага году ў межах кампаніі было даслана 820 зваротаў на адрас Генеральнай пракуратуры з заклікам ўвесці крымінальную адказнасць за бязлітасныя здзекі над жывёламі. На што быў атрыманы адказ: "Генеральнай пракуратурай з некаторымі заўвагамі сагласаваная прапанаваная Нацыянальным цэнтрам заканадаўства і прававых даследванняў Рэспублікі Беларусь рэдакцыя артыкула 339-1 Крымінальнага кодэкса Рэспублікі Беларусь (Жорсткае абыходжаньне з жывёламі)". (Нацыянальны цэнтр, як аказалася, таксама накіраваў падобную прапанову ў Пракуратуру). А Палата прадстаўнікоў Нацыянальнага Сходу РБ мелася прыняць праўкі ў Крымінальны кодэкс яшчэ ў вясенне-летнюю сесію, але адклала разгляд на кастрычнік.

У межах кампаніі ў 2013 і 2014 гг. ужо былі накіраваныя калектыўныя звароты ад шэрагу зааабарончых арганізацыяў у Адміністрацыю прэзідэнта РБ ("Прапанова аб нарматворчай дзейнасьці ў накірунку ўдасканалення прававога рэгулявання ў сферы абароны жывёлаў"), Міністэрства замежных справаў ("Прапанова аб далучэньні да канвэнцыяў Савета Эўропы па абароне жывёлаў"), зварот у Адміністрацыю прэзідэнта ад вядомых людзей краіны (музыкаў, пісьменнікаў і інш.), адаслана 820 зваротаў ад грамадзянаў у Генеральную Пракуратуру і МУС.