Тэлеканал "Белсат" страціў сваю назву праз пастанову Вярхоўнага суда

Вярхоўны суд Беларусі сёння абавязаў Польскае тэлебачанне спыніць выкарыстанне гандлёвага знаку "Белсат" пры трансляцыі на тэрыторыю Беларусі, а таксама на старонцы сайта "Белсат" у інтэрнэце, даступным для карыстальнікаў на тэрыторыі Беларусі, паведамляе Радыё Свабода. 

Суд таксама пастанавіў спагнаць з адказчыка 9 998 800 рублёў судовых выдаткаў.

Пазоў супраць кампаніі Telewizja Polska S.A., якой належыць гандлёвая марка "Белсат", быў пададзены ўладальнікам беларускай фірмы "БЕЛСАТплюс" Андрэем Беляковым у траўні мінулага года.

Паводле Белякова, яго кампанія, якая займаецца продажам абсталявання для прыёму спадарожнікавага і кабельнага тэлебачання, нібыта цярпіць страты з-за сугучнасці з назвай тэлеканала. 27 студзеня 2014 года калегія Вярхоўнага суда пазоў Белякова адхіліла ў сувязі з тым, што заяўнік не прадставіў доказаў парушэння ягоных выключных правоў на гандлёвы знак.

Але праз пяць месяцаў Прэзідыум Вярхоўнага суда Беларусі прыняў рашэнне накіраваць пазоў Андрэя Белякова супраць тэлеканала "Белсат" на новы разгляд у сувязі з нібыта недасканалым вывучэннем доказаў па справе.