Сям'і загінулага ва Украіне Міхаіла Жызнеўскага ўкраінскія фонды купілі кватэру

Бацькі загінулага на Майдане беларуса Міхаіла Жызнеўскага атрымалі ўласнае жытло. Дзякуючы падтрымцы розных фондаў ім удалося набыць двухпакаёвую кватэру ў Гомелі і тым самым выканаць мару загінулага сына, паведамляе "Белсат".

"Дзякуючы розным фондам мы атрымалі кватэру. Яны прыехалі сюды з Украіны, паглядзелі, ў якіх умовах мы жывем, і сказалі, што маці героя павінна жыць у нармальных умовах. Яны самі дамовіліся наконт кватэры. Ёсць сярод беларусаў нармальныя людзі, якія прыязджаюць, якія размаўляюць, набываюць мне дарагія лекі. Але ёсць і такія, што плююць мне ў душу. Мяне хай абражваюць, але Мішу я абражваць не дам", - гаворыць Ніна Жызнеўская, маці Міхаіла.

Міхаілу Жызнеўскаму было 25 гадоў. Апошнія 6 гадоў ён жыў у Кіеве. Хлопец загінуў падчас сутыкненняў на вуліцы Грушэўскага падчас Еўрамайдану 22 студзеня. Ён атрымаў агнявое раненне ў сэрца. Ва ўкраінскай сталіцы на развітанне з Міхаілам прыйшлі тысячы людзей. На радзіме пахаванне праходзіла ў поцемках пад пільнаю ўвагаю міліцыянтаў і людзей у цывільным.