Папа Францішак паслаў тэлеграму беларусам з нябёсаў

Личности

 Пра тое паведамляе Радыё Ватыкана.

"Пралятаючы над вашай нацыянальнай тэрыторыяй, я скіроўваю мае найлепшыя пажаданні Вашай Эксцэленцыі і Вашым суграмадзянам. Просячы Божага бласлаўлення для ўсяго народа, я малюся, каб Усемагутны Бог адарыў усіх вас дабрабытам і супакоем", - гаворыцца ў тэлеграме ад папы Францішка на імя Лукашэнкі.

Борт з папам ляцеў над тэрыторыяй Беларусі 13 жніўня каля 19.00 па мінскім часе.

Па дарозе ў Паўднёвую Карэю Францішак праляцеў над 11 краінамі: Італіяй, Харватыяй Славеніяй, Аўстрыяй, Славакіяй, Польшчай, Беларуссю, Расіяй, Манголіяй, Кітаем і, нарэшце, самой Паўднёвай Карэяй. Усяго ён пераадолеў шлях у 8970 км.

Нагадаем, што зараз пантыфік знаходзіцца з візітам ў Паўднёвай Карэі. Візіт у Сеул - першая вандроўка кіраўнікоў каталіцкай царквы ў Азію за апошнія 20 год і першая для новага пантыфіка, які заняў пост у сакавіку 2013 года.

У аэрапорце папу Францішка сустрэла асабіста прэзідэнт Паўднёвай Карэі Пак Кын Хе, перадае Бі-Бі-Сі.

Падчас візіта папа далучыць да ліку святых 124 карэйскіх каталікоў, якія памерлі за сваю веру ў XVIII-XIX стагоддзях.

Вандроўка працягнецца з 14 па 18 жніўня. Цэрэмонія кананізацыі адбудзецца ў суботу, 16 жніўня, на адной з цэнтральных плошчаў Сеула. Чакаецца, што на ёй збярэцца каля мільёна вернікаў.

Пазней у планах папы - выступ з прамовай, у якой ён закліча Паўднёвую і Паўночную Карэі да міра.

Нагадаем, што вандроўка папы супала з запускамі ракетаў бліжняга радыўса дзеяння з боку КНДР. Тры ракеты былі выпушчаныя раніцай 14 жніўня, у той час, калі самалёт пантыфіка знаходзіўся ў паветры па-над Паўднёвай Карэяй.

Яшчэ дзве ракеты былі выпушчаныя пазней.