У Нацыянальным мастацкім музеі Беларусі з'явіліся аўдыягіды

Цяпер кожны жадаючы можа праслухаць інфармацыю аб выбраных творах мастацтва, прадстаўленых у музеі, паведамляе БЕЛТА.

Кошт арэнды аўдыягіда - 20 тысяч рублёў. Гэта сума дадаткова аплачваецца да ўваходных білетаў. Пасля агляду экспазіцыі трубку трэба будзе здаць назад, інакш спрацуе сістэма апавяшчэння. Закуплена 40 такіх прыладаў.

Звесткі аб самых цікавых экспанатах прадстаўлены на трох мовах - беларускай, рускай ці англійскай. У фанаграму ўвайшлі двух- і троххвілінныя апавяданні пра 90 прадметаў з музейнай калекцыі. У далейшым плануецца пашырыць спіс аўдыятэкстаў, падчас фарміравання якога будзе ўлічвацца меркаванне наведвальнікаў.

Мабільны гід апрабаваны яшчэ вясной - у час работы праекта "Дзесяць стагоддзяў мастацтва Беларусі". Цяпер індывідуальныя экскурсіі праводзяцца па ўсёй экспазіцыі.

Атрымаць інфармацыю пра экспанаты можна і пры дапамозе QR-кодаў. Скарыстацца паслугай могуць тыя, у каго ў мабільным ёсць доступ у інтэрнэт і праграма счытвання штрых-кодаў.

Заснаваны ў 1939 годзе, сёння Нацыянальны мастацкі музей - буйнейшае ў краіне сховішча айчынных і замежных каштоўнасцей, а таксама навуковы і метадычны цэнтр. У фондах музея налічваецца больш як 24 тысячы экспанатаў.