У Дудутках адбудзецца Міжнародны фестываль сярэднявечнай культуры і музыкі «Наш Грунвальд»

 Буйнейшы ваенна-гістарычны фестываль прысвечаны 604-годдзю – адной з самых знакамітых у гісторыі Беларусі Грунвальдскай бітвы. Госці свята ўбачаць цікавую рэканструкцыю легендарнай бітвы з Тэўтонскім ордэнам, перамога над якім зрабіла Вялікае княства Літоўскае адной з самых магутных і ўплывовых дзяржаў сярэднявечнай Еўропы, піша газета "Звязда". Фестываль адбудзецца ў шосты раз.

У маштабнай дзеі возьмуць удзел ваенна-гістарычныя клубы з Беларусі, Расіі, Украіны і Польшчы. Гледачоў чакае насычаная праграма: рыцарскія турніры, масавыя пешыя і конныя баі, турніры лучнікаў і алебардыстаў, выступленні танцавальных і тэатральных калектываў, вогненнае шоу і вялікі канцэрт рок- і фолк-выканаўцаў «Баляванне пасля бітвы», а таксама розныя сярэдневяковыя забавы, кірмаш і майстар-класы ад народных умельцаў.

Цэнтральнай падзеяй фестывалю стане рэканструкцыя бітвы, якая адбылася 15 ліпеня 1410 г. на полі ля мястэчка Грунвальд паміж войскамі Тэўтонскага Ордэна і войскамі саюзнікаў: Вялікага Княства Літоўскага і Каралеўства Польскага.

У 2013 годзе ў фестывалі ўзялі ўдзел каля 400 прадстаўнікоў клубаў ваенна-гістарычнай рэканструкцыі з Беларусі і Расіі і каля 8 000 гледачоў.

Афіцыйнае адкрыццё фестывалю у 10:30 19 ліпеня.

Уваход на фестываль ўмоўна бясплатны:  дастаткова купіць ўваходны квіток у музей "Дудуткі".