Віктар Шалкевіч стаў лаўрэатам прэміі "За свабоду думкі" імя Васіля Быкава

Прэмія была заснаваная кіраўніком руху "За Свабоду", экс-кандыдатам у прэзідэнты Беларусі Аляксандрам Мілінкевічам у 2008 годзе, нагадвае БелаПАН. Яна ўручаецца за "выключны ўклад ва ўмацаванне духу беларусаў". Ідэя заснаваць такую ўзнагароду ўзнікла пасля таго, як Мілінкевіч атрымаў прэмію "За свабоду думкі" імя Андрэя Сахарава ад Еўрапарламента.

У свой час лаўрэатамі гэтай прэміі станавіліся літаратары Рыгор Барадулін і Уладзімір Арлоў, палітыкі Павел Севярынец і Уладзімір Някляеў, краязнаўцы Ада Райчонак і Алесь Белакоз, мастакі Алесь Марачкін і Алесь Пушкін, музыканты Лявон Вольскі і Зміцер Вайцюшкевіч.

Віктар Шалкевіч нарадзіўся 9 лютага 1959 года ў гарадскім пасёлку Поразава (Свіслацкі раён Гродзенскай вобласці). Вучыўся ў мясцовай школе, пасля паехаў у Мінск, дзе ў 1980 годзе скончыў Беларускі дзяржаўны тэатральна-мастацкі інстытут (цяпер Беларуская дзяржаўная акадэмія мастацтваў). У 1980—1987 гадах працаваў у Гродзенскім абласным драматычным тэатры, наступныя тры гады — выкладчыкам у Гродзенскім культурасветвучылішчы. З пачатку 1990-х і да гэтага часу працуе ў Гродзенскім абласным тэатры лялек.

На рахунку барда восем музычных альбомаў: "Правінцыя", выдадзены ў 1992 годзе, "Смутны беларускі блюз" — у 1996-м, "Балады і рамансы" — у 1998-м, "Добрай раніцы" — у 2002-м, "За сто крокаў ад Вострае Брамы" — у 2004-м, "Гарадзенец прызямліўся ў Менску" — у 2006-м і Enigmatyczne kino Lwow ("Загадкавы кінатэатр "Львоў") і "Шчаслівая сямёрка" — у 2010 годзе.