Чэрвеньскі ўік-энд па-беларуску: "Чароўны чэрвень" у Вайцюшках і "Ружанская брама" ў Пружанах

 Пачнецца фестываль а 15.00. Дзея будзе складацца з трох частак: спартова-актыўнай, літаратурнай і музычнай. 

Як паведамляла Служба інфармацыі "ЕўраБеларусі", удзел у фэсце бяруць Андрэй Хадановіч, Уладзімір Арлоў, Барыс Пятровіч, Анатоль Івашчанка, Севярын Квяткоўскі. У музычнай частцы канцэрт Касі Камоцкай і гурту "Рэха". Вядоўца - Зміцер Вайцюшкевіч.

Нагадаем, што мерапрыемства будзе праходзіць 14 чэрвеня 2014 года ў сядзібе Вайцюшкі ў Наваградскім раёне, у 170 км ад Мінска. Заставацца можна ажно да вечара нядзелі!

З нагоды начоўкі-знаходжання:

Абавязкова браць з сабой палатку, дыванок, спальнік.
Прыяжджаем на ўласных машынах альбо аўтаспынам.
Дадатковыя радасці (лазня) - за дадатковы кошт.

Адначасова ў Пружанах сёння, 14 чэрвеня, пачалося свята "Ружанская брама". На галоўнай плошчы гораду а 12.00 пачаліся выступы творчых калектываў. Запланаваныя экскурсіі, забавы для дзяцей і дарослых, выставы, пленэры і святочны канцэрт.