Андрэй Казакевіч: Залежнасць ад Расіі пагаршае развіццё Беларусі

Скончыўся тэрмін падачы заявак на стварэнне секцый па розных дысцыплінах і тэмах і на арганізацыю круглых сталоў, майстар-класаў і прэзентацый падчас Міжнароднага Кангрэсу даследчыкаў Беларусі, які адбудзецца 3-5 кастрычніка 2014 года ў Коўна. Арганізатары атрымалі больш за 50 заявак ад лідараў акадэмічнай супольнасці і асобных груп, арганізацый і людзей, зацікаўленых у пэўных тэмах сацыяльных і гуманітарных дысцыплін.

У выніку была аформлена папярэдняя структура з 10 тэматычных блокаў і панэляў, па якой да 2 чэрвеня адбываецца падача індывідуальных заявак на ўдзел у Кангрэсе.

Пра асноўныя напрамкі працы і тэмы, якія плануюць закрануць арганізатары Кангрэсу, Службе інфармацыі "ЕўраБеларусі" расказаў дырэктар інстытута “Палітычная сфера” Андрэй Казакевіч.

Аргкамітэт Міжнароднага Кангрэса даследчыкаў Беларусі вырашыў у гэтым годзе ўдзяліць больш увагі праблемам Цэнтральнай і Усходняй Еўропы. Больш увагі будзе нададзена стасункам Беларусі з краінамі-суседкамі. У прыватнасці зменам у стратэгіях вялікіх дзяржаў нашага рэгіёна. "Гэтая тэма актуальна ў сувязі са зменамі агульнай палітычнай сітуацыі ў апошнія паўгады, - лічыць Андрэй Казакевіч. – Неабходна таксама закрануць расійска-еўрапейскія адносіны, сітуацыю ў Крыму і увогуле ва Украіне".

Дырэктар інстытута “Палітычная сфера” лічыць, што нельга абмінуць тэму становішча Беларусі падчас палітычных канфліктаў краін-суседак. Таму што падзеі, якія адбываюцца ў рэгіёне, не праходзяць бясследна. "Для Беларусі мусіць быць вызначаны прыярытэт захавання незалежнасці і суверэнітэту. Асабліва гэта звязана з непрадказальнымі дзеяннямі Расіі, якія ўскосна могуць сведчыць пра магчымасць развіцця украінскага сцэнара адносна Беларусі, у тым ліку стварэнне розных расійскіх прарасійскіх радыкальных арганізацый і актывізацыі іх дзейнасці ў асобных рэгіёнах, - кажа ён. - Мы павінны зрабіць ўсё магчымае, каб пазбегнуць гэтага".

У бліжэйшы час важна вывесці Беларусь з расійска-еўрапейскай і расійска-амерыканскай канфрантацыі і не выступаць на тым ці іншым баку, таму што Беларусь у выніку больш згубіць, чым знойдзе, упэўнены Андрэй Казакевіч.

"Разам з тым важна выпраўленне геапалітычнага дысбалансу, які склаўся вакол Беларусі, паляпшэнне стасункаў з Еўропай і Штатамі. Таму што эканамічная і палітычная аднабаковая залежнасць ад Расіі пагаршае перспектывы развіцця Беларусі як незалежнай дзяржавы", - падкрэслівае палітолаг.

У гэтым годзе падчас правядзення Кангрэсу тэрытарыяльным і ваенным канфліктам на постсавецкай прасторы будзе прысвечана асобная панэль.

Сярод іншых тэм, якія будуць разглядаць навукоўцы, – мясцовая палітыка, рэгіянальнае эканамічнае развіццё ў Цэнтральнай і Усходняй Еўропе, беларуская гісторыя ў старажытны і сучасны перыяды, праблемы беларускай тапанімікі, літаратурныя традыцыі. Арганізатары таксама плануюць абмяркаваць стасункі з Усходняй і Паўдневай Азіяй, перш за ўсё з Кітаем, Індыяй і Японіяй, Паўднёвай Карэяй. Не застануцца без увагі важныя даты і юбілеі: 500 год з Аршанскай бітвы, 70 год пасля вызвалення Мінска і Беларусі, 100 год з пачатка Першай сусветный вайны.

Па словах Андрэя Казакевіча, у аргкамітэт было пададзена некалькі дзесяткаў заявак на правядзенне лекцый, прэзентацый і выстаў, таму удзельнікаў чакае насычаная культурная праграма.

Дакладная праграма будзе вядома ў бліжэйшы час, кажуць арганізатары. Пакуль што яны чакаюць індывідуальныя заяўкі для ўдзелу ў Кангрэсе. Для таго, каб даслаць заяўку, трэба запоўніць анкету да 2 чэрвеня.

Каля 400 навукоўцаў з 22 краін свету прымуць удзел у наступных тэматычных блоках:

Эканоміка
Праблемы інавацыйнага развіцця беларускай прамысловасці
Праблемы трансфармацыі і мадэрнізацыі эканомікі Беларусі
Эканоміка беларускіх рэгіёнаў

Палітычныя інстытуты, нацыянальная ідэнтычнасць
Мясцовыя інстытуты і палітыка ў Цэнтральнай і Усходняй Еўропе: вынікі (не)дэмакратычных пераўтварэнняў
Палітычная апазіцыя ў краінах былога Савецкага Саюза
Нацыянальная ідэнтычнасць у палітыцы краінаў былой Рэчы Паспалітай

Міжнародныя адносіны і знешняя палітыка
“Новыя звышдзяржавы” i Цэнтральна-Усходняя Еўропа: нерэалізаваныя магчымасці ці пераацэненыя перспектывы?
Узброеныя канфлікты на постсавецкай прасторы ў 1990-2014 гадах (Крым, Абхазія, Нагорны Карабах і г.д.)
Сярэдняя Еўропа ў палітыцы вялікіх дзяржаў
Беларуская знешняя палітыка

Дзяржава, грамадзянская супольнасць, навука, адукацыя
Стан, магчымасці і перcпектывы навукі, адукацыі і акадэмічнай супольнасці ў Беларусі
Дзяржаўнае кіраванне і публічная палітыка Беларусі
Беларуская грамадзянская супольнасць: стан і перспектывы

Беларускае грамадства: мова і трансфармацыя інфармацыйнай прасторы
Лінгвістычныя праекты як сродак кансалідацыі беларускага грамадства
Сацыяльныя сеткі і мадэрнізацыя Беларусі
Дваццаць гадоў беларускаму інтэрнэту (1994-2014): гісторыя і сацыяльная эвалюцыя

Гісторыя
Традыцыі шляхецкага самакіравання ў гісторыі Вялікага Княства Літоўскага (да 450-годдзя прыняцця Бельскага прывілея 1 ліпеня 1564 г.)
ВКЛ: ад крыніцы да нарацыі (праблемы інтэрпрэтацыі пісьмовай спадчыны)
Супрасльская тыпаграфія і гандаль царкоўнымі кнігамі ў Беларусі
Беларусь у складзе Расійскай імперыі (канец XVIII — пачатак ХХ ст.)
Насілле ў ХХ стагоддзі: вопыт, наступствы, памяць і спадчына
Гісторыя Беларусі ХХ стагоддзя
Памежжа і межы: ад картаграфіі да літаратуры
Яўрэі ў кантэксце беларускай гісторыі
Беларускае замежжа: асэнсаванне інтэлектуальнай спадчыны
Беларуская некрапалістыка
Беларусы ў Польшчы: мінулае, цяперашні час, будучыня

Літаратура, лінгвістыка
Герменеўтычны патэнцыял нацыянальных культур і шматмоўнае пісьменства Вялікага Княства Літоўскага
Літаратура пасля «Бум-Бам-Літа»: творчыя плыні канца ХХ — пачатку ХХІ ст.
Беларускі тапанімікон: праблемы ўпарадкавання і стандартызацыі
Беларуская Біблія: Праблемы і перспектывы навуковага пераклад

Даследаванне рэлігіі
Святыя ў беларускай гісторыі і сучаснасці: асобы, месцы, тэксты, супольнасць

Культура, музейная справа, архітэктура, мастацтва
Сучасная беларуская культура: пошук новай матрыцы ці жыццё пасля нацыі?
Праблема стварэння каталогу рэпрэзентатыўных твораў Беларусі ХХ-ХХІ ст.
Менеджмент у сучасных культурных праектах
Музейная справа і ахова гісторыка-культурнай спадчыны
Сучасная архітэктура Беларусі: праблемы вывучэння і перспектывы развіцця
Традыцыя і посттрадыцыя ў культурным ландшафце Беларусі
Дуды ў паўночна-усходняй Еўропе: гісторыя і ўзаемаўплывы

Гендэрныя даследаванні
Гендэрныя «правілы»: дыскурсы, палітыкі і практыкі
Даследаванне маскуліннасці: міждысцыплінарная акадэмічная вобласць