Рада беларускай інтэлігенцыі выказала салідарнасць з Украінай

На паседжанні грамадскай ініцыятывы  "Рада беларускай інтэлігенцыі" была прынята заява з нагоды падзеяў ва Украіне.

"Сапраўднай прычынай, якая справакавала хвалю антыўкраінскіх бунтаў у Крыме і ва ўсходніх рэгіёнах Украіны, з'яўляюцца імпэрскія памкненні расейскага кіраўніцтва", — гаворыцца ў заяве, змешчанай на сайце vytoki.net.

"Рыторыка, якой апраўдваюцца правакацыйныя дзеянні, грунтуецца на сцьвярджэннях пра „прыцясненні“ расейскамоўнага насельніцтва і не адпавядае рэчаіснасці. Палітыка русыфікацыі, скіраваная на знішчэнне нацыянальных моваў, нацыянальнай тоеснасці, культуры, гістарычнай памяці народаў, якія ўваходзілі ў склад Расейскай імпэрыі, актыўна выкарыстоўвалася яшчэ ў царскай Расеі. У гады існаваньня СССР яна працягвалася пад лозунгам стварэння „новай гістарычнай фармацыі - савецкага чалавека“", - адзначана ў заяве.

Аўтары дадалі: "Гэтая праблема добра вядомая і ў Беларусі, дзе сучасныя манкурты на дзяржаўных пасадах працягваюць вынішчэнне беларускай мовы. Відавочна, што з такой сытуацыяй нельга мірыцца. Нацыянальным мовам у незалежных краінах, якія ўтварыліся пасля распаду СССР, павінен быць вернуты адпаведны статус. Трактаваць гэта як „уціск расейскамоўнага насельніцтва“ — несумленна і амаральна. Падобнымі мэтадамі кіравалася ў свой час гебэльсаўская прапаганда, разлічаная, як вядома, не на інтэлектуальныя эліты, а, па прызнанні яе стваральнікаў, „на апошняга падонка ў краіне“.

Рада заклікае прадстаўнікоў расейкай інтэлігенцыі, "якія захавалі ясны розум і сумленьне", выкарыстаць усе свае сілы і магчымасьці, каб давесці да народаў Расеі ўсведамленне небяспекі, якую нясуць імперскія авантуры крамлёўскага кіраўніцтва".

Рада беларускай інтэлігенцыі выказала салідарнасць з народам Украіны і заклікала ўсіх сумленных людзей у свеце падтрымаць Украіну ў абароне яе незалежнасці і тэрытарыяльнай цэласнасці.