Фільм "Каханне па-беларуску" атрымаў узнагароду кінафестывалю

Фестываль адбыўся ў горадзе Торуні. Ён з'яўляецца месцам сустрэчы знаных рэпарцёраў, рэжысёраў, драматургаў, якія ствараюць рэпартажы, дакументальныя фільмы і тэатральныя спектаклі на падставе сапраўдных падзей. Сёлетняя імпрэза адбывалася пад лозунгам "25 гадоў свабоды". Таму асаблівае месца ў праграме фестывалю займалі рэпартажы і фільмы пра падзеі ад пачатку "Салідарнасці" праз выбары першага некамуністычнага ўраду ў Польшчы, падзенне Берлінскага муру і аж да апошніх падзеяў ва Украіне.

На конкурс былі прадстаўленыя 107 прац з усіх каналаў Польскага грамадзкага тэлебачання - Польскай тэлевізіі. Папярэдняе журы выбрала з іх 36 рэпартажаў і фільмаў для ўдзелу ў фінале. Яны былі паказаныя ў Торуні. Журы на чале з выбітнай польскай кінадакументалісткай Марыяй Эльжбэтай Змарз-Качановіч і прысудзіла галоўны прыз белсатаўскаму фільму. Гэтая сенсацыя фэстывалю была горача падтрыманая публікай і польскімі творцамі на цырымоніі закрыцця фэстывалю. Бурнымі авацыямі заля вітала рэжысёраў Вячаслава Ракіцкага і Андрэя Куцілу, іх ляўрэацкія прамовы.

"Гэта вельмі важная і прынцыповая перамога і для нас з Андрэем, і для тэлеканалу „Белсат“, - сказаў Радыё Свабода Вячаслаў Ракіцкі. - Па-першае, яна атрыманая ў канкурэнцыі з творцамі вельмі аўтарытэтнага ў свеце польскага дакументальнага кіно. Па-другое, яна засведчыла высокі ўзровень кінадакументалістыкі каналу „Белсат“. Па-трэцяе — гэтая прэмія даказвае, што ў Беларусі насуперак волі рэжыму жыве і развіваецца дакументальнае кіно без цэнзуры, якое адлюстроўвае сучасную беларускую рэальнасць для наступных пакаленняў. І самае галоўнае - гэтая прэмія яшчэ і факт салідарнасці польскіх творцаў з беларускімі палітвязьнямі".

Узнагарода на фестывалі "Мастацтва факту" ў польскім горадзе Торунь стала першай для фільма "Каханне па-беларуску". У яго аснове - гісторыя пераможнага кахання праз турэмныя краты юных змагароў за свабоду Беларусі Насты і Зьмітра Дашкевічаў. Прэм’ера фільма адбылася на "Белсаце" напярэдадні Калядаў — 24 снежня 2013 году. Стужка ўжо дэманстравалася і на некаторых іншых каналах Польскай тэлевізіі. "Белсат" таксама плануе прадставіць фільм на адборачныя конкурсы шэрагу міжнародных фестываляў.