Беларускамоўныя курсы з'яўляюцца ў рэгіёнах

Сталічныя курсы беларускай мовы “Мова нанова” пашыраюць сваю геаграфію. Спачатку заняткі прайшлі ў Бабруйску, дзе мясцовыя актывісты цяпер самастойна працягваюць гэтую справу. А сёння “Мова нанова” наведала Гомель, - піша Беларускае Радыё Рацыя

Кажа адзін з арганізатараў курсаў Глеб Лабадзенка: "На занятках у Гомелі прысутнічала 30 чалавек, і як адзначыў арганізатар гомельскіх заняткаў Яўген Меркіс, старшыня гомельскай “Талакі”, больш за палову людзей ён бачыць упершыню. І гэта вельмі крута. Таму што ён чалавек грамадска актыўны, і сам вельмі здзівіўся з таго, што прыйшлі абсалютна новыя, незаангажаваныя людзі".

У Гомелі курсы беларускай мовы атрымалі назву “Мова плюс”.

У пятніцу, 14 сакавіка, “Мова нанова” наведае Гародню, а ў суботу, 15 сакавіка, устаноўчыя заняткі курсаў адбудуцца ў Баранавічах.