Сёння хаваюць забітага на Еўрамайдане беларуса Міхаіла Жызнеўскага

 Беларуса, які загінуў 22 студзеня на вуліцы Грушэўскага ў Кіеве, пахаваюць сёння ў пасёлку Сцяг Працы пад Гомелем. На пахаванне можа прыехаць кожны, хто жадае праводзіць у апошні шлях свайго суайчынніка, паведаміў Службе інфармацыі "ЕўраБеларусі" грамадскі актывіст Андрэй Стрыжак, які займаецца зборам сродкаў для дапамогі сям'е Міхаіла.

Напярэдадні памяць загінулага ўшанавалі ў Белай Царкве пад Кіевам, дзе Жызнеўскі некаторы час жыў пасля таго, як з'ехаў з Беларусі. З героем Майдана развіталіся і ў Кіеве: у Міхайлаўскім Залатаверхім саборы адслужылі малебен, а потым труну з целам маладзёна перанеслі на Майдан Незалежнасці, каб пратэстоўцы аддалі апошнюю пашану беларусу, які падтрымаў іх памкненні да свабоды. 

Міхаіл Жызнеўскі быў чальцом украінскай групоўкі УНА-УНСА (Украінская нацыянальная асамблея - Украінская народная самаабарона), дзе яго ведалі пад мянушкай "Локі".

Паводле словаў маці Жызнеўскага, Міхаіл паехаў ва Украіну яшчэ ў 2005 годзе. Вясной гэтага года ён планаваў вярнуцца да бацькоў. 26 студзеня Міхаілу б споўнілася 26 гадоў. Хлопец усяго некалькі дзён не дажыў да свайго Дня народзінаў.

Актывіста Майдана забілі з помпавай стрэльбы карцеччу 12-га калібра. Пра гэта паведамляе ветэран УНА-УНСО і палітвязень акцыі "Украіна без Кучмы" Ігар Мазур. "Гэта патрон, з якім ідуць паляваць на дзіка", - удакладніў Мазур.

У Львове прапануюць назваць вуліцу імем МІхаіла Жызнеўскага і прысвоіць забітаму беларусу званне "Ганаровы грамадзянін горада".