Зламыснікі захапілі кіраванне сайтам кампаніі “Будзьма беларусамі!”

Замест сайта budzma.org аб навінах кампаніі можна даведацца на сайце budzma.by. Змены адбыліся ў сувязі з тым, што ноччу 18 снежня быў захоплены зламыснікамі дамен budzma.org, паведаміў Службе інфармацыі “ЕўраБеларусі” прэс-сакратар грамадскай культурніцкай кампаніі “Будзьма беларусамі!” Алесь Плотка.

- Зараз мы высвятляем, хто мог прымаць удзел у захапленні дамену, на гэты конт у кампаніі ёсць пэўныя думкі, - паясняе Алесь Плотка. – Але пакуль гэта толькі падазрэнні. Цяпер не хочацца раскідвацца словамі, таму мы паведамім дэталі, калі высветліцца, хто мае да гэтага дачыненні і чаму захапленне адбылося. А зараз мы чакаем усіх па новаму адрасу і выбачаемся за нязручнасць.

Кампанія спадзяецца, што бліжэйшым часам праблемы будуць вырашаны. Пасля будуць дзейнічаць абодва сайта.