Чытанні ў дворыку музея Максіма Багдановіча будуць штодзённымі

Першая акцыя ў абарону музея Максіма Багдановіча прайшла ўвечары 16 снежня – падтрымаць установу сабралася каля 30 чалавек, большасць складалі дзеячы культуры ды журналісты. Былі і людзі ў цывільным – папярэдзілі пра незаконнасць несанкцыянаванай масавай акцыі ды пільна здымалі ўсіх на відэа.

Пісьменнікі не былі супраць таго, каб пачытаць вершы Максіма Багдановіча і ў самім музеі, але ж, як сказаў Службе інфармацыі "ЕўраБеларусі" мастак Алесь Марачкін, "тут сітуацыя далікатная – назаўтра дырэктарка музею паляціць са сваёй пасады, калі мы ў памяшканні музею будзем чытаць".

Як бы там ні было, усе жадаючыя пачыталі вершы класіка і нават спелі "Зорку Венеру". Пасля акцыі не затрымалі нікога – але ці ж будзе так і потым, бо пісьменнік Уладзімір Арлоў паведаміў Службе інфармацыі "ЕўраБеларусі", што такія акцыі будуць праходзіць штодня а 18-й гадзіне. "Будуць і барды з песнямі, будуць, напэўна, перформансы", - сказаў ён.

Нагадаем, Міністэрства культуры ініцыявала пераўтварэнне музея Багдановіча ў філію Дзяржаўнага музея гісторыі беларускай літаратуры. На думку Арлова, скарачэнне колькасці супрацоўнікаў да пяці чалавек ад цяперашніх сарака можа ўвогуле выклікаць у будучыні поўную ліквідацыю ўстановы.

Але надзея на станоўчае рашэнне праблемы ёсць, кажа Уладзімір Арлоў. "Мне вядома, што Міністэрства юстыцыі вярнула ў Міністэрства культуры праект пастановы пра так званую аптымізацыю. Бо заснавальнікам музею Багдановіча з'яўляецца не Мінкульт, а Мінгарвыканкам. Паводле ж нашых законаў, ліквідаваць установу можа толькі яе заснавальнік. Атрымоўваецца, што Мінкульт ад самага пачатку дзейнічаў незаконна", - патлумачыў Уладзімір Арлоў.