"Дзяды" ў Мiнску: дождж, мова і адно затрыманне

Акции / Фото

Дождж і холад, але а 12-й каля Лошыцкага парку сабралася ледзь больш за паўсотні чалавек з бел-чырвона-белымі сцягамі і расцяжкамі Кансерватыўна-хрысціянскай партыі – БНФ. Амапаўцы прыбылі раней – воддаль стаялі два аўтазакі ды аўтобус з людзьмі ў цывільным, апошнія таксама былі і ля месца збору актывістаў, што традыцыйна сабраліся ў Лошыцы, каб ушанаваць памяць загінулых ад бальшавіцкага тэрору беларусаў.

Кіраўнік інфармацыйна-прапагандысцкай камісіі партыі Валер Буйвал падзякаваў людзям за тое, што надвор'е не перашкодзіла ім прыйсці да крыжа беларусам-пакутнікам, і зачытаў прывітальнае слова Зянона Пазьняка. Лідэр партыі, што з 90-х знаходзіцца ў эміграцыі, падтрымаў свайго намесніка Юрыя Беленькага. Нагадаем, на мінулым тыдні заява Беленькага на мітынгу ў Курапатах выклікала даволі гарачую дыскусію ў беларускім грамадстве. Заклікаючы моладзь размаўляць па-беларуску, Беленькі тады заявіў: "Памятай, калі ты размаўляеш па-руску, ты ў акупацыйнай арміі, страляеш у свой народ".

"Масква цудоўна разумее, што галоўнай асновай існавання беларускай нацыі ёсць беларуская мова. (...) Пры тым тое, што бачыць і разумее Масква, ужо – у выніку асляплення – не бачыць і не разумее бальшыня беларускага грамадства. І раптам з'яўляецца публічная асоба, якая публічна і адкрыта пра тое кажа, - напісаў Пазьняк пра заяву Беленькага. - Кажа так вобразна і так моцна, што яе пачынаюць слухаць і думаць над сэнсам слоў. І тады, падкрэсліваю, толькі тады, калі бачаць, што словы даходзяць, тады пачынаецца істэрыка акупантаў. Гэта істэрыка страху начнога злодзея, калі раптам уключылі святло". Пазьняк далучыўся да слоў Беленькага і таксама заклікаў моладзь "не ўступаць у акупацыйную армію, не страляць у саміх сябе".

Сам жа Юры Беленькі гэтым разам больш сканцэнтраваўся на іншых этнасах, якія, на яго думку, хутка будуць гаспадарыць на беларускай зямлі, калі беларусы не ўспомняць, што менавіта яны – уладары тут. Што да бізнесу, то ён і так ужо амаль увесь расейскі, мяркуе Беленькі, але і гэта яшчэ не ўсё: "Нас спрабуюць дабіць. Туркменскія астраўкі тут ужо скора будуць, кітайскія індустрыяльныя паркі... І ёсць людзі якія быццам спрыяюць гэтай ідэі, абараняюць рэжым. (...) Ствараецца механізм, каб вось гэта сістэма абрабавала ўсіх нас. А што будзе з намі? Спрабуюць проста дабіць нас, уклініўшы сюды чужыя этнасы, і забраць усю эканоміку".

Напрыканцы мітынгу пад відэакамеры грамадзян у цывільным быў спеты "Магутны Божа" і людзі пачалі разыходзіцца. Але не абыйшлося без затрымання. Актывіст са Стоўбцаў Леанід Смоўж апрануў паверх швэдара майку з лозунгам "За Беларусь без дыктатуры". Пасля мітынгу ён быў затрыманы – ужо на прыпынку грамадскага транспарту. Смаўжа будуць судзіць ў панядзелак, 11 лістапада.