"Ляпіс Трубяцкі" выдаў першы беларускамоўны альбом

 Ені змяшчае 10 вядомых трэкаў з новым мастэрынгам і 2 цалкам новыя песні – "Месяц" і "Сонейка".

"Гэты альбом не мае нейкай пэўнай канцэпцыі, – тлумачыць лідар "Ляпісаў" Сяргей Міхалок. – У ім ёсць сонечныя, яркія песні, а ёсць сумныя, журботныя, прасякнутыя настальгіяй. Яны былі напісаныя ў розныя перыяды майго жыцця і адлюстроўваюць усю палярнасць маіх поглядаў і эмоцый. А прысвяціць гэтую пласцінку я хачу тым людзям, якія ламаюць тандэтны, залізаны, тэлевізійна-малюнкавы вобраз беларусаў – гэткіх цярплівых, ціхіх, спакойных, працавітых, якія не любяць зменаў. Мы жадаем паказаць, што ёсць і іншыя беларусы – якія могуць быць дзёрзкімі, шумнымі, могуць не баяцця праяўляць сваю індывідуальнасць, якія не жадаюць пражыць сваё жыццё рахама і памяркоўна, а жадаюць быць волатамі, кіроўцамі сваіх лёсаў. Якія ў розных сферах жыцця ствараюць, змагаюцца, дасягаюць, здзіўляюць. Такіх людзей шмат, мы іх ведаем і альбом "Грай" – для іх і пра іх".

Адмыслова да выдання на складанцы "Грай" ужо вядомыя трэкі атрымалі новы мастэрынг ад Джасціна Штурца, які працуе на студыі Sterling Sound у Нью-Ёрку – і загучалі па-новаму.

"Джасцін працаваў над альбомамі Slipknot, Paramore і іншых вядомых артыстаў, ён вельмі круты прафесіянал, – распавядае Міхалок. – Я гэта зразумеў, калі пасля яго працы раптам пачуў у некаторых нашых старых песнях партыі, якія да гэтага наогул не было чуваць ".

Прэзентацыя альбома "Грай" адбудзецца ў Вільні, на стадыёне Siemens Arena, 30 лістапада. Напярэдадні гэтага канцэрта альбом будзе выдадзены на CD, вініле і адмысловых mp3-плэерах Lyapis Crew.

Беларуская прэм’ера альбома адбылася на партале Tut.by . Расійская – на партале “Яндэкс музыка". Украінская – на партале Vesti.ua .