Андрэй Пачобут выдаў кніжку пра Лукашэнку

Як паведамляе "Наша Нiва", прэзентацыя кнігі ў Варшаве прызначана на 23 кастрычніка, але ўжо з'явілася першая рэцэнзія ў штодзённіку "Rzeczpospolita" пад загалоўкам "Тэатр Лукашэнкі".

Аўтар рэцэнзіі піша, што кніга нечым нагадвае папулярны фільм "Мільянер з трушчобаў": "У 1994 г. звычайны вясковы настаўнік Аляксандр Лукашэнка паставіў усё на адну карту, але замест мільёна выйграў усю краіну ў цэнтры Еўропы. З тых часоў свет стаў асацыяваць Беларусь з імём аднаго чалавека, які грае галоўную ролю ў самастойна створаным тэатры".

Андрэй Пачобут — журналіст польскай "Газэты Выборчай". У 2011-м годзе суд прызнаў яго вінаватым у парушэнні крымінальнага артыкула "Паклёп на прэзідэнта". Журналіста пакаралі трыма гадамі пазбаўлення волі з адтэрміноўкай на два гады. Яшчэ адну крымінальную справу, пра паўторны паклёп на кіраўніка дзяржавы, завялі на Пачобута ўлетку 2012 года. У сакавіку 2013 года справу спынілі ў сувязі з адсутнасцю ў дзеяньнях журналіста складу злачынства.
23 верасня 2013 г. суд вырашыў вызваліць Андрэя Пачобута ад прызначанага судом пакарання на падставе таго, што ў перыяд адтэрміноўкі "асуджаны законапаслухмянымі паводзінамі даказаў сваё выпраўленне".