Аляксей Шэін: У выяздным мыце больш ідэалогіі, чым эканомікі

- Я перакананы, што за ідэяй пошліны ў 100 долараў за выезд з Беларусі стаіць не столькі эканамічная матывацыя, а, магчыма, несвядомае ці нават падсвядомае жаданне ўлады вельмі сур'ёзна абмежаваць людзям магчымасць паглядзець на тое, што ёсць па-за межамі краіны, - каментуе Аляксей Шэін Службе інфармацыі "ЕўраБеларусі" ініцыятыву Аляксандра Лукашэнкі збіраць па "100 долараў з носа" з кожнага, хто едзе за мяжу. - Уявім сабе 100 долараў гэтага мыта, 60 еўра за шэнгенскую візу, дадамо кошт квіткоў - і чалавеку ўжо выязджаць няма сэнсу.

Зараз мы займаем першае месца ў свеце па выдадзеных шэнгенскіх візах на душу насельніцтва і, канешне, людзі, якія выязджаюць, бачаць якасць тавараў, могуць параўнаць кошты іх з беларускімі, могуць параўнаць узровень свабоды тут і там. Для іх гэта з'яўляецца вельмі добрай вакцынай ад дзяржаўнай прапаганды. Улада ж стараецца нейкімі савецкімі метадамі калі не забараніць, то вельмі ўскладніць выезд людзям за мяжу. Каб трымаць тут усіх пад каўпаком прапаганды і ўмацаваць так званую стабільнасць у сваіх руках, не дапускаючы аніякіх праяваў незадаволенасці.

Зазначым, што Аляксей Шэін стаўся арганізатарам збору подпісаў супраць выязднога мыта на сайце Change.org. За няпоўны тыдзень сабрана пад 25.000 галасоў супраць дзіўнай ініцыятывы ўладаў.