Вакол Нацыянальнага мастацкага музея пабудуюць музейны квартал

"Праз пяць гадоў мы плануем сфарміраваць цэлы музейны квартал з усёй інфраструктурай. Тут будуць кафэ і рэстаран, магазін, куды можна будзе прыйсці да 4 раніцы. Дзеля ажыццяўлення гэтага плана будзе праводзіцца рэканструкцыя вуліцы Кірава і паралельна вуліцы Карла Маркса", - перадае БЕЛТА словы Ўладзіміра Пракапцова. Ён адзначыў, што праектныя работы, на якія выдзелена 4,5 мільярды рублёў, ужо вядуцца.

Творчая сустрэча прайшла ў час адкрытай персанальнай выстаўкі Уладзіміра Пракапцова "Струны прасторы і часу", прысвечанай двайному асабістаму святу кіраўніка музея - 60-годдзю з дня нараджэння і 15-годдзю дзейнасці на пасадзе дырэктара буйнейшага музея краіны.

Экспазіцыя ахоплівае перыяд з 1973 па 2013 год. Прадстаўленыя карціны сведчаць аб пастаянным творчым пошуку і самаўдасканаленні. Жывапіс для аўтара - магчымасць праявіць сябе і адлюстраваць на палатне напружанасць думак. "Бацькоўскі дом", "Начны Віцебск", "Вытокі", "Вечнае" - у сваіх творах жывапісец, поўны шчырасці пачуццяў і эмоцый, паўстае ў сапраўдным абліччы.

Выстаўка адкрылася 8 жніўня і павінна прадоўжыцца роўна 8 дзён 8 гадзін 8 мінут і 8 секунд.