Маці Андрэя Гайдукова змагла наведаць сына ў СІЗА

Да ўступленьня прысуду ў сілу Андрэй Гайдукоў утрымліваецца ў Віцебскім СІЗА, нагадвае Радыё Свабода.

Спатканне адбывалася праз шкло. Маці і сын кантактавалі праз тэлефон цягам дзвюх гадзінаў. Трымаецца Андрэй годна, настрой бадзёры, ён нават жартуе, кажа спадарыня Вольга.

Гэта другое спатканьне: першае было адразу пасля суду і васьмі месяцаў следства. Лісты ад сына прыходзяць рэгулярна, раз на тыдзень дазволены перадачы, дадала Вольга Гайдукова.

1 ліпеня 2013 года Віцебскі абласны суд прызнаў Андрэя Гайдукова вінаватым у спробе ўстаналявання кантактаў з замежнай выведкай і асудзіў на 1,5 гады калоніі. Працэс праходзіў у закрытым рэжыме. Падчас следства ён амаль паўгода ўтрымліваўся ў турме КДБ, спачатку хлопца абвінавачвалі ў шпіянажы.

Пры канцы жніўня ў Вярхоўным судзе будзе разглядацца касацыйная скарга Андрэя Гайдукова.