У Нацыянальным гістарычным музеі адкрылася выстава канфіскату

Выстава дзейнічае ў рамках доўгатэрміновага выставачнага праекта “Культура не ведае правінцыі”, мэта якога – паказаць унікальныя музейныя калекцыі абласных і раённых музеяў краіны. Яна прэзентуе збор Музея "Выратаваныя мастацкія каштоўнасці" – філіяла Брэсцкага абласнога краязнаўчага музея. Гэта адзіны ў Беларусі і на тэрыторыі СНД музей, дзе экспануюцца творы мастацтва і прадметы антыкварыяту, канфіскаваныя пры спробе незаконнага вывазу іх за мяжу, паведамляе прэс-служба Нацыянальнага гістарычнага музею.

На выставе прадстаўлена больш за 300 помнікаў гісторыі і культуры, твораў выяўленчага і дэкаратыўна-прыкладнога мастацтва якім пашанцавала вярнуцца з небыцця і заняць пачэснае месца ў экспазіцыйных залах.

Экспазіцыя складаецца з помнікаў нумізматыкі і баністыкі VІ-ХХ стст. – гэта манеты Візантыі, еўрапейскіх краін, Рэчы Паспалітай і інш. Калекцыя прадметаў з каштоўных металаў прадстаўлена паясамі і кінжаламі працы майстроў Паўночнага Каўказа, срэбнымі партсігарамі і іншымі вырабамі дэкаратыўна-прыкладнага мастацтва. Экспануюцца творы мастацтва краін Усходу, сярод якіх кітайскія дэкаратыўныя накладкі, сярэднеазіяцкі посуд з медзі і іншае. Заходнюю Еўропу прадстаўляюць рыжскі хрусталь, выкшталцоныя прадметы побыту і посуд, графіка. Адной з найбольш цікавых частак экспазіцыі з’яўляецца калекцыя абразоў ХVІІІ-ХХ стст., бо рускі іканапіс — адметная з’ява сусветнай мастацкай культуры. Дапаўняюць экспазіцыю сакральнага мастацтва ўзоры Растоўскай фініфці і рускага меднага ліцця, рарытэтныя кніжныя выданні.