Генадзь Бураўкін: "Нешта ў нашым грамадстве зламалася…"

 Такое меркаванне ў размове са Службай інфармацыі “ЕўраБеларусі” выказаў вядомы беларускі паэт, былы прадстаўнiк Беларусi ў ААН Генадзь Бураўкін.

Сустракаючыся 29 ліпеня ў Мінску з патрыярхам Маскоўскім і ўсяе Русі Кірылам прэзідэнт Беларусі Аляксандр Лукашэнка заявіў, што заходняя цывілізацыя перажывае вельмі глыбокі крызіс маралі і духоўнасці.

Генадзь Бураўкін пагадзіўся з гэтай думкай толькі часткова: “Думаю, што сапраўды нейкі крызіс маралі ў нашым часе ёсць. Але гэта датычыць не толькі Захаду. На жаль, і ў нашай роднай Беларусі сапраўды некаторыя законы маралі не надта часта ўспамінаюцца. Відавочна, што нам не хапае высокай маральнасці ў адносінах паміж людзьмі і ў адносінах паміж дзяржавай і грамадзянамі”.

У якасці прыкладу паэт прыгадаў “судовыя працэсы над некаторымі людьмі, якія, так сказаць, лаяліся матам у грамадскім месцы”. “Даруйце, але мне не надта верыцца ў справядлівасць тых людзей, якія разглядаюць гэтыя справы. Дзе яны жывуць, няўжо не чуюць тое, што ў нас часам гучыць на вуліцах, у Мінску? Яны не чуюць нейкіх нелітаратурных выказванняў на рабочых прахадных? Няўжо яны не ведаюць, што нашыя міліцыянты, ахоўнікі парадку, не надта выбіраюць словы? Дык чаму адных за гэта вельмі жорстка караюць, а другім за гэта нічога такога няма?” – задаўся пытаннямі Генадзь Бураўкін.

Таксама ён заўважыў, што паказчыкам праблемаў з маральнасцю з’яўляецца недастаткова паважлівае стаўленне да старых людей: “Прычым гэта тычыцца як іхняга матэрыяльнага становішча, так і проста павагі да іх. І я не лічу, што ў нас з гэтым добра”. Іншыя прыклады – вялізная няроўнасць у аплаце працы, праблемы алкагалізму, жорсткія злачынствы.

“Нешта ў нашым грамадстве зламалася, нешта адбываецца не так, як хацелася б. Толькі шукаць гэта трэба не столькі ў чужых краінах, колькі ў саміх сябе, – лічыць Генадзь Бураўкін. – І калі мы навядзем парадак у сябе дома, калі ў нас будзе выдатная сітуацыя, калі мы будзем паважаць Канстытуцыю, будзем любіць і карыстацца роднай беларускай мовай, будзем паважаць нашу культуру – тады і сапраўды можна будзе казаць пра тое, што робіцца ў іншых месцах. А пакуль што я звярнуў бы ўвагу на праблемы ў нас дома”.

На думку паэта, дзейнасць праваслаўнай царквы і каталаліцкага касцёла ў Беларусі агулам дапамагаюць маральнасці грамадства. “Але тое, што і сярод служак царквы, і сярод вернікаў не ўсё добра, у мяне таксама няма ніякіх сумневаў. У рэшце рэшт, царква і касцёл таксама даволі спакойна глядзяць на многія дрэнныя з’явы ў нашым грамадстве, не прымаюць нейкіх асаблівых мераў супраць алкагалізму, супраць дрэннай адукаванасці нашых людзей. Зрэшты, як мне здаецца, і царква, і касцёл больш, чым нашыя чыноўнікі, заклікаюць да маральнасці, нагадваюць пра хрысціянскія законы, Божыя запаветы. Таму тут іхняя заслуга ёсць. Але я не сказаў бы, што яны робяць усё, што могуць”, – адзначыў Генадзь Бураўкін.