Новы паўстанцкі маршрут: ад Мілавідаў да Слоніма

Маршрут распрацаваны ў межах кампаніі “1863”, якая дзейнічае пры падтрымцы Міжнароднага кансорцыюму “ЕўраБеларусь”.

Распрацоўшчык маршруту, гід-экскурсавод Цімафей Акудовіч распавёў пра асноўныя кропкі новага маршрута:

1. Вёска Мілавіды Баранавіцкага раёну - месца правядзення вядомай бітвы 22 траўня 1863 года, у якой перамога засталася за паўстанцамі. Тады царскія войскі страцілі забітымі 50 чалавек, а паўстанцы – 18. Ахвяры бітвы пахаваныя па розныя бакі шашы, якая пралягае каля месца бітвы.

2. Вёска Чамялы Івацэвіцкага раёну – месца, дзе захавалася паштовая станцыя тых часоў, якую захоплівалі паўстанцы.

3. Вёска Быцень Івацэвіцкага раёну. Там знаходзіцца знакаміты ўніяцкі манастыр – месца, дзе паўстанцы праводзілі да прысягі сялянаў.

4. Вёска Шылавічы Слонімскага раёну. Там знаходзіцца царква Казанскай іконы Божай маці, пабудаваная ў першай палове XIX ст., дзе таксама паўстанцы прымалі сялян у свае шэрагі. Таксама ў вёсцы захаваўся стары спіртзавод братоў Пуслоўскіх пачатку XX ст.

5. Вёска Азярніцы Слонімскага раёну– вёска, дзе стаіць царква, таксама пабудовы XIX ст.

6. Горад Слонім, дзе можна будзе агледзець праваслаўныя і каталіцкія храмы XVII-XVIII стагоддзяў, і пазнаёміцца з багатай гісторыяй паўстання ў гэтым горадзе.