У Мінску ўпершыню прайшоў Дзень культуры народаў ВКЛ (фота)

Акции / Фото

Фэст "Дзень культуры народаў Вялікага княства Літоўскага" стаў, здаецца, першым этапам таго грандыёзнага праекту, пра які яшчэ ў маі гэтага году крыху распавёў Службе інфармацыі "ЕўраБеларусі" дырэктар Нацыянальнага мастацкага музею Уладзімір Пракапцоў. Тады ў Мінску адкрылася выстава "Партрэты ўладароў і магнатаў Вялікага княства Літоўскага", якая аб'яднала экспанаты Львоўскага гістарычнага музею, Львоўскай нацыянальнай галерэі мастацтваў і Валынскага краязнаўчага музею ў Луцку. Да экспазіцыі далучыліся і 12 партрэтаў з калекцыі Нацыянальнага мастацкага музею Беларусі.

Адкрываючы імпрэзу ўвечары серады, Уладзімір Пракапцоў  нагадаў, што агульная гісторыя ВКЛ звязвае чатыры народы - жыхароў Беларусі, Літвы, Польшчы, Украіны.

- Таму мы вырашылі сёння распачаць у межах нашага выставачнага праекту і такую акцыю. Я спадзяюся, мы далучымся да той нашай агульнай гісторыі і культуры, якія нас звязваюць. Думаю, што мы і надалей будзем сумесна ладзіць такія культурныя акцыі. І, канешне, нам вельмі важна далучыць да гэтага нашу моладзь.

Нягледзячы на дождж, які распачынаўся з кожным новым выступам (хіба толькі "Палацу" ўдалося адыграць без асаблівых капрызаў надвор'я) і вечар будняга дня, народу сабралася даволі багата. І ўнутраны дворык Нацмузею выдатна падыходзіць дзеля такіх вось камерных канцэртаў, толькі сцэна можа і занадта далёка ад гледачоў. Але, разам з тым, ніхто і не перашкаджаў падыходзіць бліжэй. Сярод публікі быў заўважаны былы кандыдат на прэзідэнта краіны, паэт Уладзімір Някляеў, які паведаміў Службе інфармацыі "ЕўраБеларусі", што засумаваў па культурніцкіх імпрэзах, якія праходзяць звычайна ўвечары, а па вечарах Някляеў быў абавязаны па рашэнню суда быць дома.

- Зараз я вольны ад гэтага абавязку, таму з задавальненнем прыйшоў сюды. А што да спадчыны ВКЛ, то, думаю, супольныя справы ў нашых народаў будуць і надалей. У нас быў свой асаблівы шлях, што і адрознівала ВКЛ як ад суседзяў з Усходу, так і с Захаду.

Распачаўся канцэрт выступам літоўскага праекту з багатай гісторыяй (ажно ад 1991 году) Aiste Smilgeviciute & SKYLE. Цікавы жаночы вакал, фолк, рок, арт, тэксты на літоўскай, прускай мовах і нават жамойцкім дыялекце літоўскай. Нездарма гурт у 2012-м атрымаў адмысловую ўзнагароду з рук прэзідэнта Літвы Далі Грыбаўскайтэ.

Пасол Літвы ў Беларусі Эвалдас Ігнатавічус распавёў публіцы, што амбасада Літвы была "радая стаць часткай гэтага праекту".

- Вялікае княства Літоўскае... Мяркую, што слова "вялікае" абазначае не толькі гісторыю ды геаграфію, але і наш вялікі дух. Зусім нядаўна ў Мінску прайшла вечарына Magnus Ducatus Poesis ("Вялікае Княства Паэзіі"), дзе сустрэліся літоўскія і беларускія паэты. Сёння - музыкі. Вялікае княства Літоўскае - яно з намі, не толькі ў падручніках гісторыі, яно жыве, дыхае, спявае.

Сапраўдны фурор на фэсце зрабілі Volosi з Польшчы - струнны квінтэт, які ўжо скарыў Еўропу сваім віртуозным выкананнем, шалёным рухам на сцэне і нават мімікай выканаўцаў. Палякі некалькі разоў збіраліся сыходзіць са сцэны, але ж гледачы апладысментамі ў каторы раз выклікалі іх на біс.

Пасля Volosi "ГЫЧ Аркестру" з Львову прыйшлося цяжкавата, але іх "далікатнае выкананне экстравагантнай музыкі" праз пэўны час знайшло сваіх прыхільнікаў сярод наведвальнікаў дворыка Нацмузею.

Закрываў імпрэзу - ўжо ў цемры - беларускі хэдлайнер "Палац". Алег Хаменка, лідэр ужо без нацяжкі культавага гурта, распавёў Службе інфармацыі "ЕўраБеларусі", што адчуў "абсалютную падрыхтаванасць публікі" да першага Дня культуры народаў ВКЛ.

- Хаця, з іншага боку, крыху элітарным мерапрыемствам стала гэтая імпрэза, бо не кожны ў Менску і ведае, дзе там той Нацыянальны мастацкі музей. Таму вось толькі такія хібы - крыху падвяло надвор'е ды змушаная элітарнасць ці камернасць фэсту, - рэзюмаваў Алег Хаменка.