Творы знакамітага гарадзенца Леона Бакста могуць трапіць у Беларусь

Як паведаміў пасол Беларусі ў Францыі Павел Латушка, супрацоўнікі беларускай амбасады нядаўна знайшлі працы Бакста на парыжскай выставе. Адзін з беларускіх банкаў ужо зацікаўлены пакупкай іх праз аўкцыён Sotheby’s. Дарэчы, гэтай вясной такім чынам ужо ўдалося набыць для Беларусі чатыры палотны Марка Шагала і Хаіма Суціна.

Коштавы рэкорд на твор Бакста быў усталяваны ў траўні 2012 года ў Лондане на аўкцыёне Christie’s. Акварэльны твор “Жоўтая султанша” ананімны пакупнік набыў за амаль 1. 500.000 даляраў (937.000 фунтаў стэрлінгаў).

Пачатковы кошт трох эскізаў тэатральных касцюмаў, якія ў лютым гэтага года прапанаваў пакупнікам у Парыжы аўкцыённы дом Sotheby’s, значна меншы - 80 тысяч еўра.

Нарадзіўся Бакст (сапраўднае імя Леў Розенберг) у 1866 годзе ў Гродне, у сям’і габрэйскага вучонага-талмудыста. Яго талент раскрыўся ў поўнай меры ў Парыжы.

У Гродне імём знакамітага мастака названая вуліца, якая знаходзіцца на гарадской акраіне – у Фабрычным, піша "Твой Стыль".