Праваабаронцы з розных гарадоў Беларусі рыхтуюць акцыі да гадавіны затрымання Бяляцкага

Гродзенскія актывісты Ўладзімір Хільмановіч, Віктар Сазонаў і Раман Юргель падалі заяўку на правядзеньне пікету ў мясцовы гарвыканкам, паведмаляе Радыё Свабода.

Паводле Хільмановіча, пікет плануюць правесці 4 жніўня ў парку ля Каложскай царквы.

Пікетоўцы хочуць паінфармаваць жыхароў гораду пра сітуацыю са зняволеным кіраўніком праваабарончага цэнтру «Вясна».

Раней гомельскія грамадскія актывісты Анатоль Паплаўны, Юры Варонежцаў і Леанід Судаленка падалі ў гарвыканкам заяўку на вулічнае шэсце ў падтрымку Алеся Бяляцкага.

«Шэсце мы маем намер правесці 4 жніўня — ад цэнтральнай плошчы Леніна па вуліцы Савецкай і да ўнівэрсітэту імя Францішка Скарыны, дзе ў свой час вучыўся Бяляцкі. Усе ўдзельнікі шэсця будуць у майках з партрэтам праваабаронцы. Апрача таго, будуць скарыстаны лозунгі: „Свабоду Бяляцкаму!“, „За вашу і нашу свабоду!“ ды іншыя», — заявіў Свабодзе Анатоль Паплаўны.

Магілёўскія праваабаронцы Аляксей Колчын і Барыс Бухель падалі заяўку ў гарвыканкам на правядзенне 4 жніўня пікета за вызваленне беларускіх палітвязняў. Праваабаронцы збіраюцца праводзіць пікетаванне ў цэнтры гораду непадалёк ад будынку гарвыканкаму. Мяркуецца, што ў пікеце возьмуць удзел да 15 чалавек.

Кіраўнік праваабарончага цэнтру «Вясна» Алесь Бяляцкі асуджаны на 4,5 гадоў турмы ў лістападзе 2011 году. Яго прызналі вінаватым у нясплаце падаткаў. Праваабаронца сваёй віны не прызнаў і заявіў, што ўсе грошы, атрыманыя на ягоныя рахункі, ішлі на праваабарончую дзейнасць і падтрымку сем’яў палітвязняў.