На былога палітвязня Васіля Парфянкова заводзяць новую крымінальную справу

Васіль Парфянкоў распавёў Радыё Свабода, што 27 чэрвеня, калі ён прыехаў на чарговае адзначэнне ў пастарунак, інспектар сказаў 28 чэрвеня прыйсці да следчага.

«Са следчым мы доўга не размаўлялі, бо не было адваката. Я сказаў, што без адваката ніякіх паказанняў даваць не буду. Ён папярэдзіў, маўляў, май на ўвазе, што заведзена справа. Следчы сказаў, што пакуль я магу быць вольным. Сказаў, што, магчыма, будзе выклікаць на наступным тыдні. Сказаў, што яшчэ будзе апытваць маіх бацькоў».

Васіль Парфянкоў быў здзіўлены, што супраць яго зноў пачалі крымінальны пераслед:

«На гэты момант у мяне толькі два парушэнні, а звычайна для пачатку крымінальнай справы трэба тры парушэнні. Следчы кажа, што два парушэнні — гэта ўжо сыстэма. І нібыта інспектар убачыў у гэтым падставы для таго, каб пачаць справу».

Васіль расказаў пра свае парушэнні: адзін раз ён выйшаў у краму, а другі — крыху спазніўся дадому. А менавіта ў гэты момант прыходзілі міліцыянты.

«У выніку я не быў дома пасля 20 гадзінаў, хаця павінен быў. Мне неаднаразова казаў мой участковы інспектар, што кожную раніцу на планёрцы пытаюцца, як там той палітычны. Відаць, я ім не патрэбны на волі, хаця ніякіх крымінальных праблем я ім не ствараю. Не ведаю, чаму яны за мяне так узяліся», — сказаў Васіль.

У маі гэтага году суд Першамайскага раёну Мінска пакараў Васіля Парфянкова штрафам у 3 мільёны рублёў за парушэнне прафілактычнага нагляду, які быў усталяваны за былым палітвязнем пасля адбыцця паўгода арышту ў Баранавіцкім арыштным доме. Суддзя Юры Гарбатоўскі, які й раней судзіў Васіля Парфянкова, прызнаў, што 11 траўня той парушыў умовы прафілактычнага нагляду, бо ў вечаровы час яго не было дома.

У канцы чэрвеня ў былога палітвязня павінен быў скончыцца тэрмін прафілактычнага нагляду.