Былы палітвязень Сяргей Каваленко зноў апынуўся пад пагрозай зняволення

“Гэтае папярэджанне тычыцца таго ж эпізоду ад 25 сакавіка, калі мяне абвінавацілі, што я нібыта не там перайшоў дарогу. Зараз кажуць, што нібыта яшчэ і нецэнзурна лаяўся на міліцыянтаў. Адвакат патлумачыў, што гэтых двух папярэджанняў ім дастаткова, каб зноў адправіць мяне за краты”, - распавёў Сяргей Каваленка ў размове з Радыё Свабода.

“Паспрабую абскардзіць папярэджанні, але праблема ў тым, што нават копіі гэтых папер міліцыянты не даюць. Працягваецца прававое бязмежжа, як у 2010 годзе, калі мяне гэтаксама пасля двух папярэджанняў з „хатняй хіміі“ адправілі ў рэальную турму”, — заявіў былы палітвязень.

Сяргей Каваленка быў асуджаны на 2 гады і адзін месяц зняволеньня пасля таго, як вывесіў бел-чырвона-белы сцяг на навагодняй ёлцы ў Віцебску. Падчас следства і суду некалькі разоў трымаў працяглыя галадоўкі. Быў памілаваны ў верасні 2012-га пасля амаль году зняволеньня. На два гады Каваленку паставілі на прафілактычны ўлік.