Аўтара «Гродназнаўства» не зацвердзілі на пасаду прафэсара

У сакавіку Шведа пазбавілі пасады кіраўніка кафедры беларускай культуры і рэгіянальнага турызму, перадае Радыё Свабода.

Паводле самога Вячаслава Шведа, праз 2-3 дні павінен з’явіцца загад рэктара ўнівэрсытэта пра ягоны далейшы лёс. Хутчэй за ўсё гэта будзе загад аб звальненні.

Вячаслаў Швед адпрацаваў у Гарадзенскім універсітэце імя Я.Купалы больш за 30 гадоў. Год таму яго ўзнагародзілі медалём «За заслугі перад Гарадзенскім дзяржаўным універсітэтам імя Янкі Купалы».

Вячаслаў Швед аўтар шматлікіх кніг па гісторыі Горадні. Ён таксама адзін з аўтараў кнігі «Гродназнаўства». Першапачаткова інфармацыя пра кнігу шырока падавалася ў мясцовых СМІ, ладзіліся прэзентацыі. Але праз некаторы час аўтараў пачалі выклікаць на размовы з супрацоўнікамі рэктарату, а таксама КДБ.

Аднаго з аўтараў — Андрэя Чарнікевіча — з фармулёўкаю «за парушэнне працоўнай дысцыпліны» звольнілі з ГрДзУ. Пазней старшыня Гарадзенскага аблвыканкаму Сямён Шапіра публічна прызнаўся, што асабіста даў загад звольніць з Гарадзенскага ўнівэрсытэту дацэнта Андрэя Чарнякевіча.