6 меркаванняў: пагоршылася ці палепшылася сітуацыя з правамі чалавека ў Беларусі?

Праваабаронца Алена Танкачова, якую выслалі з Беларусі ў 2015 годзе:

"Я не схільная фіксаваць, паляпшэнне ці пагаршэнне. Сітуацыя не мяняецца. Яна стагнацыйна знаходзіцца ў такім вось сталым стане. Я заўсёды казала, што мы не можам крытычную сітуацыю, калі былі 54 палітвязні, параўноўваць з той, якая ёсць праз паўгода. Бо сам факт усплёскаў больш жорсткага парушэння правоў чалавека сведчыць толькі пра тое, што ўлады пачынаюць яшчэ больш прыбягаць да парушэнняў. Але ён не сведчыць, што сітуацыя палепшылася пасля таго, як крызіс праходзіць. Яна стабільна дрэнная, і механізмаў для паляпшэння сітуацыі як не было, так і няма".

Дырэктар Цэнтра еўрапейскай трансфармацыі Андрэй Ягораў:

"Сітуацыя не палепшылася. Ніякіх структурных змен няма. Відавочна, што правы чалавека масава парушаюцца. Шэраг правоў вельмі цяжка, калі наогул магчыма, рэалізаваць. Гэта не кажучы ўжо пра палітычныя правы. Але частку сацыяльна-эканамічных правоў немагчыма рэалізаваць у Беларусі".

Кіраўнік "Платформы" Андрэй Бандарэнка:

"Сітуацыя не змянілася. Яна засталася стабільнай, якой была з 2010-2011 года. Нічога практычна не змянілася. Ёсць нейкія фасадныя змены, якія дзяржава спрабуе прадставіць як паляпшэнне ў сферы правоў чалавека. Але ў рэальнасці ўсё засталося на тым жа самым узроўні. Прынамсі, з умовамі ў турмах і з правамі зняволеных наогул ніякіх змен".

Старшыня БХК Алег Гулак:

"Калі параўноўваць з 2013 годам, калі адбыўся мінулы форум, то, канечне, сітуацыя з правамі чалавека палепшылася. На жаль, палепшылася не настолькі, наколькі хацелася б і трэба было. Гэта іншае пытанне. Але зараз, па вялікім рахунку, мы рэальна маглі б правесці гэты форум у Мінску. У 2013 годзе гэта было немагчыма. А цяпер у нас гэта атрымалася б. Проста планавалі загадзя, таму ўжо не было магчымасці пераносіць. Але, з пункту гледжання магчымасці атрымаць залю і прыехаць замежным гасцям, гэта ўсё спрасцілася. І ўсё ж такі пытанне з палітзняволенымі па-іншаму выглядае. І ў іншых сферах ёсць пэўныя зрухі. Канечне, гэта далёка ад таго, што хацелася б і можна было зрабіць за гэты час. Але сітуацыя лепшая".

Прадстаўнік Freedom House Віціс Юрконіс:

"Нягледзячы на тое, што вялікага пагаршэння не было адносна правоў чалавека, сітуацыя не мяняецца: яна як была, так і застаецца даволі дрэннай. Можна ўзгадаць разгон 25 сакавіка, але не варта акцэнтаваць увагу толькі на адным эпізодзе. У прынцыпе, вялікіх змен у плане правоў чалавека не было, і сітуацыя застаецца стабільна дрэннай".

Праваабаронца "Вясны" Уладзь Лабковіч:

"Ад мінулага форума сітуацыя сістэматычна не палепшылася. Кропкавых мяккіх практык, якія ўжывалі ўлады, не хапіла нават на год. І зноў мы вярнуліся да масавых затрыманняў удзельнікаў мірных сходаў і пераследу журналістаў. Улады Беларусі ўжо навучыліся жангляваць пытаннямі правоў чалавека ў сваім дыялогу з Еўропай. І робячы невялікія, нязначныя саступкі, яны пакідаюць рэпрэсіўную сістэму ўціску правоў грамадства".

Радыё "Свабода"