ЗША, ААН і ЕС занепакоеныя затрыманнямі ў Беларусі

Вашынгтон сочыць за "няспыннымі мірнымі пратэстамі ў Беларусі", сказаў прадстаўнік Дзяржаўнага дэпартаменту. "Мы занепакоеныя шматлікімі затрыманнямі ўдзельнікаў і журналістаў падчас нядаўніх пратэстаў. Мы заклікаем улады Беларусі прытрымлівацца сваіх міжнародных абавязанняў і паважаць свабоду слова, друку і сходаў", - адзначыў ён.

Эксперт ААН у пытаннях правоў чалавека заклікаў Мінск устрымацца ад гвалту і цкавання пратэстоўцаў і паважаць свабоду мірных сходаў.

"Міжнароднай супольнасці варта заставацца ўважлівай. Разам з тым я заклікаю беларускія ўлады спыніць гвалт і цкаванне і паважаць свабоду мірных сходаў", — гаворыцца ў апублікаванай сёння заяве Міклаша Харасці, адмысловага дакладчыка ў пытаннях правоў чалавека ў Беларусі.

Еўрапейскі саюз заклікаў да неадкладнага вызвалення ўсіх затрыманых пратэстоўцаў. Мая Каціянчыч, прэсавая сакратарка кіраўніцы замежнай палітыкі ЭЗ, заявіла 13 сакавіка, што "затрыманне і пакаранне мірных пратэстоўцаў, у іх ліку апазыцыйных лідэраў, супярэчыць абвешчанай Беларуссю палітыцы дэмакратызацыі", паведамляе "Радыё Свабода".