Апазіыйным актывістам у Маладзечне далі ад 7 да 15 сутак

Суд Маладзечанскага раёна пакараў старшыню Руху “За Свабоду” Юрыя Губарэвіча арыштам на 15 сутак за арганізацыю Марша “Я недармаед” у Маладзечне, паведамляе Еўрарадыё са спасылкай на прэс-службу арганізацыі. Такі ж тэрмін атрымалі старшыня Аб’яднанай грамадзянскай партыі Анатоль Лябедзька і сустаршыня Беларускай Хрысціянскай Дэмакратыі Віталь Рымашэўскі.

Суддзя Аляксей Іршын не задаволіў хадайніцтва Губарэвіча пра выклік у суд у якасці сведак старшыні АГП Анатоля Лябедзькі і сустаршыні БХД Віталя Рымашэўскага, на вядзенне фота- і відэаздымкаў. Пасля яшчэ аднаго хадайніцтва старшыні Руху быў выкліканы дзяжурны адвакат, яны атрымалі час для азнаямлення са справай.

Іршын зачытаў, што Губарэвіч абвінавачваецца па арт. 23.34 ч. 3 (арганізацыя ці ўдзел у несанкцыянаваных масавых мерапрыемствах, якія былі здзейсненыя паўторна). Па словах суддзі, лідар Руху ўдзельнічаў у несанкцыянаваным мерапрыемстве і “з дапамогай вуснай мовы выкрыкваў лозунгі” за адмену Дэкрэта № 3.

Губарэвіч не прызнаў сабе вінаватым, хаця згадзіўся з тым, што ён быў на плошчы, удзельнічаў у акцыі.

Лідарку Хрысціянска-дэмакратычнага руху Вольгу Кавалькову, таксама затрыманую на акцыі 10 сакавіка, асудзілі на 7 сутак. Столькі ж далі жыхару Маладзечна Гмыза Аляксандру, які выступаў на мітынгу, паведаміў у фэйсбуку адказны сакратар БХД Дзяніс Садоўскі. 

Як паведамляла "ЕўраБеларусь", раней суд даў штрафы па 50 базавых велічынь актывісту АГП Дзянісу Красочцы і старшыні Мінскай абласной арганізацыі БСДП Алесю Абрамовічу.