Партыя БНФ накіруе шэраг зваротаў у дзяржорганы па фактах актыўнасці "русского мира"

Па словах яе старшыні Аляксея Янукевіча, і Беларусь, і партыя стаяць перад вялікімі выклікамі, піша Радыё Рацыя.

– Мы бачым новую хвалю інфармацыйнай атакі на Беларусь. Мы бачым, што павялічваецца і актывізуецца дзейнасць прарасійскай, пракрамлёўскай пятай калоны ў Беларусі. Часта гэта адбываецца пры спрыянні пэўных дзяржаўных устаноў. І гэтаму трэба супрацьстаяць, бо такая дзейнасць падрывае незалежнасць Беларусі, наносіць шкоду і пагражае самому дзяржаўнаму суверэнітэту.

Па словах Аляксея Янукевіча, Партыя БНФ запланавала шэраг зваротаў па ўсіх канкрэтных фактах антыбеларускай актыўнасці так званага „русского мира” ў Беларусі. Такія звароты будуць накіраваныя ў многія дзяржаўныя ўстановы: у Пракуратуру, Следчы камітэт, міністэрствы інфармацыі, адукацыі, культуры, абароны, у апарат упаўнаважанага па справах рэлігій і нацыянальнасцяў, а таксама кіраўніцтву Беларускай Праваслаўнай Царквы.