Павел Севярынец атрымаў адразу шэсць павестак у суд

Пра гэта сустрашыня партыі БХД паведаміў на сваёй старонцы ў Фэйсбуку.

"У маёй багатай практыцы такое першы раз. Агулам прайшоў каля 70 адміністрацыйных судоў за акцыі пратэсту (дарэчы, апраўдальны прысуд быў толькі аднойчы - у 2006-ым у Полацкім раённым судзе). Але каб 6 павестак за дзень - гэта ўжо нейкі джэк-пот. Хто там гаманіў пра лібералізацыю? Запрашаю на судовы канвеер для ўдзельнікаў акцыяў салідарнасці - гэтае відовішча добра прачышчае мазгі наконт "дэмакратычных зменаў" у апошнія пару гадоў", - напісаў Павел Севярынец.

Палітык штодня ўдзельнічаў у пікетах салідарнасці з блогерам Эдуардам Пальчысам ля сцен Мінскага гарадскога суда, дзе заснавальніка сайта 1863х.com судзяць у закрытым рэжыме за "распальванне варожасці і распаўсюд праз інтэрнэт парнаграфічных матэрыялаў".