Севярынца аштрафавалі на 1050 рублёў

Фрунзенскі суд Мінска аштрафаваў сустаршыню Беларускай хрысціянскай дэмакратыі Паўла Севярынца на 50 базавых (1050 рублёў).

У пратаколе сутнасць правапарушэння сфармулявалі так: «Стаяў на фоне расцяжкі „Лукашэнка, сыходзь!“, выкрыкваў „Жыве Беларусь!“ і публічна выказваў сваё меркаванне адносна выбараў у Палату прадстаўнікоў».

У інтэрв'ю карэспандэнту Свабоды Павал Севярынец назваў вырак суда беззаконнем:

«Калі людзі выходзяць абараняць закон, выходзяць пратэставаць супраць фальсіфікацый, а іх за гэта штрафуюць — гэта беззаконне ў квадраце. Сённяшняму рэжыму не хапае грошай, таму штампуюць штрафы. Звычайна на такія суды ўжо не хаджу, бо ведаю вырак — 50 базавых. Ну, і прыйдзе час, калі новая, дэмакратычная ўлада дасць ацэнку ўсяму гэтаму беззаконню».