Дзярждэп: Мы ўважліва сочым за справай Эдуарда Пальчыса

За год прыпынення санкцый і паляпшэння адносінаў быў павялічаны дыпламатычны штат амбасады ЗША, што дазволіла нашым краінам больш шчыльна супрацоўнічаць у такіх накірунках, як гандлёвае супрацоўніцтва і бяспека, канстатуе намеснік памочніка дзяржсакратара ЗША Брыджыт Брынк.

“Пытанне нармалізацыі адносінаў ― гэта шматступенчаты працэс. І пытанне вяртання амбасадараў – адна з прыступак гэтага працэсу”, ― заявіла дыпламат.

А каб гэта нармалізацыя ішла як мага хутчэй, Беларусі неабходна прыслухацца да рэкамендацый БДІПЧ АБСЕ па зменах нашага выбарчага заканадаўства. І найперш размова ідзе пра сумленнае фарміраванне выбарчых камісій і празрысты падлік галасоў. Тым не менш, шчыра прызнаецца:

“Рашэнне аб працягу прыпынення санкцый звязана з тым, як прайшлі выбары ў Беларусі. Па іх завяршэнні мы зрабілі заяву, якая брала ў разлік вынікі назірання БДІПЧ АБСЕ. Мы віталі мірны характар мірны характар правядзення выбараў, адзначалі пэўны прагрэс і тое, што ў парламенце ўпершыню за 12 гадоў будуць прадстаўленыя альтэрнатыўныя кандыдаты. Што праўда, звярталі ўвагу і на негатыўныя моманты”.

Але ёсць і яшчэ адзін момант. "Еўрарадыё" пацікавілася ў амерыканскага дыпламата, як з’яўленне ў Беларусі новага палітвязня можа паўплываць на нашы двухбаковыя адносіны,

“Як вы ведаеце, вызваленне шасці палітычных зняволеных у жніўні 2015 года было тым крокам, які паўплываў на наша першапачатковае рашэнне аб змякчэнні санкцый, ― кажа Брыджыт Брынк. ― Сёння мы ўважліва сочым за справай Эдуарда Пальчыса (беларускія праваабаронцы прызналі яго палітычным зняволеным). Але нічога на гэты конт я сказаць не магу, бо ёсць цэлы шэраг момантаў, якія бяруцца пад увагу, калі Урад ЗША вызначае: ці гэты чалавек палітычны зняволены, ці не”.