У Гродне назіральнікаў не пускалі на закрытыя ўчасткі без санкніжкі

Такія выпадкі зафіксаваныя на ўчастках №21 (кардыялогія), №22 (нефралогія), №23 (радыялогія)  Гродзенскай-Цэнтральнай выбарчай акругі №51. Пра гэта паведаміў каардынатар назірання па гэтай акрузе Сяргей Верамеенка, інфармуе сайт кампаніі.

"Назіральнікі "Права выбару-2016" папярэдне дамаўляліся са старшынямі камісій (а гэта галоўныя ўрачы ці іх намеснікі), што назіральнікам дадуць белыя халаты і пусцяць па палатах, толькі трэба будзе купіць бахілы. Аднак сёння нас практычна нікуды не пускаюць, матывуючы тым, што мы не маем санітарнай кніжкі. Пытаюся ў старшыні камісіі - галоўнага ўрача неўралогіі: наведвальнікаў пускаюць да хворых, а нас да хворых выбаршчыкаў не дапускаюць? На што ўрач спаслаўся на ўнутранае распараджэнне: ёсць вызначаны час для наведвальнікаў, а для нас няма ніякіх гадзін", - распавёў Сяргей Верамеенка.

Сябры камісіі ўчастка №22 разышліся са скрынямі па палатах: на 179 выбаршчыкаў выдалі 174 бюлетэні - нібыта ўсе выбаршчыкі ляжачыя, хадзячых няма.