У Беларусі з'явіцца амбасадар ЗША

Пра гэта заявіў Аляксандар Лукашэнка 11 верасня, адказваючы на пытанне карэспандэнта «Свабоды» на ўчастку для галасавання ў Беларускім дзяржаўным універсітэце фізічнай культуры.

«Амбасадар абавязкова будзе, мы пра гэта ў прынцыпе дамовіліся. Калі — спытаеце ў амерыканскага боку», — сказаў Лукашэнка.

Кіраўнік краіны пагадзіўся, што гэта ненармальна, што амбасадараў няма так доўга.

«Але я спадзяюся, мы гэта хутка вырашым, і вам не давядзецца ездзіць у Вільню або Кіеў па візы. Хоць гэта пытанне да ЗША, яны што не могуць без амбасадара візы выдаваць? Амбасадар жа візы не выдае», — адзначыў Лукашэнка.

Адказваючы на пытанне Reuters, ці сочыць ён за выбарамі ў ЗША, Лукашэнка сказаў, што амерыканскае грамадства яшчэ не гатовае абраць жанчыну, «нават спадарыню Клінтан, хоць яна вопытны чалавек, была дзяржсакратаром». Пры гэтым Біла Клінтана Лукашэнка назваў сваім «блізкім сябрам». Лукашэнка дадаў, што Беларусь таксама не гатовая мець жанчыну-прэзідэнта. Кіраўнік краіны адзначыў, што Дональд Трамп мае «моцныя пазіцыі і можа стаць прэзідэнтам». Паводле Лукашэнкі, дынаміка росту яго рэйтынгу ўражвае, і Трамп можа перамагчы не менш чым на 5-7%.