Міліцыя спрабуе трапіць у кватэру назіральніка Артура Фінькевіча

"Шаноўныя журналісты і прадстаўнікі міжнародных назіральных місій! Я давераная асоба кандыдата Віктара Янчурэвіча, да мяне цягам апошніх дзвюх гадзінаў ломяцца ў кватэру, прашу ўсіх, хто можа, пад'ехаць, відавочна, што хочуць затрымаць за пададзеныя скаргі!" - напісаў на сваёй старонцы ў Фэйсбуку назіральнік.

Пазней Артур Фінькевіч распавёў Еўрарадыё: 

"На пачатку восьмай гадзіны бесперапынна званілі ў званок і грукалі ў дзверы. Я не падыходзіў. Я назіраю на адным з участкаў і паралельна каардыную па акрузе назіранне. Мы пісалі шмат скаргаў, выявілі шмат парушэнняў".

Назіральнікі заяўляюць пра парушэнні на сёлетніх выбарах: завышэнне яўкі, прымус студэнтаў да датэрміновага галасавання. На 625-м выбарчым участку па 108 выбарчай акрузе кандыдаты заявілі пра ўкід бюлетэняў.