Макей: Мінск і Кіеў не маюць неразвязаных праблем

«Паміж нашымі краінамі, і я мушу гэта канстатаваць, не існуе ніякіх нявырашаных праблем, нам заўсёды ўдавалася знайсці ўзаемапрымальнае рашэнне тых ці іншых цяжкіх пытанняў, якія ўзнікалі. Таму сёння мы можам смела казаць пра спелае партнёрства, якое існуе паміж нашымі дзяржавамі», — сказаў Уладзімір Макей у Кіеве падчас афіцыйнага адкрыцця рэзідэнцыі пасла і жылога комплексу для супрацоўнікаў Амбасады Беларусі ва Украіне.

У той ж час беларускі міністр звярнуў увагу на трывалую адсутнасць у Мінску кіраўніка дыпламатычнага прадстаўніцтва Украіны, і гэтую тэму ён абмяркоўваў сёння ў часе сустрэчы са сваім украінскім калегам Паўлом Клімкіным. «Вядома, гэта ўплывае на нашы ўзаемаадносіны», — дадаў ён.

Разам з тым, беларускі бок пакуль трымае нейтралітэт у пытанні вышуку былога пасла Украіны ў Беларусі Міхайла Ежаля. На просьбу журналістаў пацвердзіць ягонае знаходжанне ў Мінску, Уладзімір Макей адказаў: «Я не маю інфармацыі пра ягонае месцазнаходжанне».

У сакавіку 2016 года вайсковая пракуратура Украіны высунула Міхаілу Ежалю абвінавачанне ў неналежным выкананні службовых абавязкаў пры ўзгадненні ў 2011 годзе пераліку вайсковай маёмасці Узброеных сіл Украіны, якая падлягала адчужэнню. Зараз праваахоўныя органы Украіны абвясцілі яго ў міжнародны вышук, а 22 жніўня 2016 года Пячэрскі раённы суд Кіева дазволіў Генеральнай пракуратуры Украіны праводзіць завочнае дасудовае расследаванне крымінальнай справы супраць Міхаіла Ежаля. Ён узначальваў Амбасаду Украіны ў Беларусі да траўня 2015 года. Генеральная пракуратура ў чарговы раз чакае яго на допыце 5 верасня, паведамляе "Радыё Свабода".

Прэзідэнт Украіны Пятро Парашэнка 24 жніўня заявіў, што пасол Украіны ў Беларусі будзе прызначаны ў найбліжэйшы час.