Беларускія вайскоўцы ўдзельнічаюць у вучэннях АДКБ паблізу межаў краін НАТО

«Падчас вучэнняў будуць адпрацаваныя пытанні планавання сумеснай аперацыі і арганізацыі кіравання кантынгентамі КСАР АДКБ падчас лакалізацыі ўзброенага канфлікту», — гаворыцца ў паведамленні на сайце АДКБ.

Вучэнні пройдуць у Пскоўскай вобласці пад кіраўніцтвам камандуючага войскамі Заходняй ваеннай акругі Узброеных сіл РФ. У вучэннях будуць удзельнічаць вайскоўцы Беларусі, Арменіі, Казахстана, Кыргызстана, Расіі і Таджыкістана.

«Ад беларускага боку ў вучэнні прымуць удзел аператыўная група Міністэрства абароны, афіцэры, вызначаныя ў склад камандавання КСАР, падраздзяленні 103-й асобнай гвардзейскай паветрана-дэсантнай брыгады сіл спецыяльных аперацый Узброеных сіл, прызначаныя ад Узброеных сіл Рэспублікі Беларусь у склад КСАР АДКБ», — паведамляе прэс-служба Мінабароны Беларусі.

Пскоўская вобласць, дзе будуць праходзіць вучэнні, мяжуе з Беларуссю, а таксама двума краінамі-чальцамі НАТО — Латвіяй і Эстоніяй, перадае "Радыё Свабода".